पोलिसांनी केली डॉक्टर वर कारवाईची मागणी
इंदापूर : महान्यूज लाईव्ह
बलात्कार पीडित अल्पवयीन मुलीची वैद्यकीय तपासणी करण्यासाठी इंदापूरच्या उपजिल्हा रुग्णालयातील उपस्थित डॉक्टरने नकार दिला व या गंभीर गुन्ह्यातील पिडीतेची हेळसांड केली असा आरोप पोलिसांच्या वतीने करण्यात आला असून इंदापूर पोलिसांनी संबंधित डॉक्टरविरुद्ध कारवाई करण्याची विनंती उपजिल्हा रुग्णालय व ससून रुग्णालयाला केली आहे.
24 जून रोजी इंदापूर पोलिसांनी बलात्कार पीडित अल्पवयीन मुलीस इंदापूरच्या उपजिल्हा रुग्णालयात तपासणीसाठी नेले होते, त्यावेळी तेथे उपस्थित असलेले डॉक्टर साळुंखे यांनी तिची तपासणी करण्यास नकार दिला. सध्या कोरोनाचा काळ असून सदर मुलगी कुठे कुठे फिरून आली आहे, मला माहिती नाही, त्याचप्रमाणे या ठिकाणी स्त्री रोग तज्ञ उपस्थित नाही, त्यामुळे मी तिची तपासणी करू शकत नाही अशा शब्दात त्यांनी या मुलीची तपासणी करण्यास नकार दिला. त्यावेळी या दवाखान्यात उपस्थित असलेल्या महिला कर्मचाऱ्याने विनंती करून सदर गुन्हा गंभीर असून यामध्ये इतरवेळी पुरुष डॉक्टर तपासणी करतात, आपणही करावी अशी विनंती केल्यानंतर त्यावेळीही संबंधित डॉक्टरांनी त्यास नकार दिला.
या सर्व प्रकरणात पिडीतेची हेळसांड झाली. तिला बारामती येथील महिला रुग्णालयात तपासणी करून घ्यावी असेच सांगितले गेले आणि संबंधित डॉक्टर तिथून निघून गेले, त्यामुळे इंदापूरचे सहाय्यक पोलीस निरीक्षक व्ही. जी. लोकरे यांनी इंदापूरच्या उपजिल्हा रुग्णालयाचे वैद्यकीय अधीक्षकासह ससून रुग्णालयातही यासंदर्भात संबंधित डॉक्टरांवर कर्तव्यात कसूर केल्याप्रकरणी योग्य ती कारवाई करण्याची विनंती केली आहे.
