बारामतीचे डॉक्टर सांगतील.. कोरोनाकाळातले मानसिक आरोग्य अन् मास्क वापरण्याच्या पद्धती
बारामती : महान्यूज लाईव्ह
येत्या 1 जुलै रोजी डॉक्टर्स डे निमित्त बारामतीतील डॉक्टर कोरोना काळातल्या मानसिक आरोग्य व इतर परिस्थितीविषयी रेडिओ रागिणीवरुन जनजागर करणार आहेत. १ जुलै रोजी सकाळी ९ ते सायं ५ या वेळेत हे प्रसारण होणार आहे.
भारताचे प्रसिद्ध चिकित्सक डॉ. विधानचंद्र रॉय यांना श्रद्धांजली आणि सन्मान म्हणून १ जुलै हा दिवस ‘डॉक्टर्स डे’ म्हणून साजरा केला जातो. ४ फेब्रुवारी १९६१ साली डॉ विधानचंद्र रॉय यांना त्यांच्या वैद्यकीय क्षेत्रातील कार्यामुळे भारताचा सर्वोच्च नागरिक सन्मान ‘भारतरत्न’ बहाल करण्यात आला, तेव्हापासून १ जुलै या दिवशी भारतामध्ये सर्वत्र डॉक्टर्स डे साजरा केला जातो.याच अनुषंगाने येत्या १ जुलैच्या ‘डॉक्टर्स डे’ निमित्त पुणे जिल्ह्यातील पहिल्या इंटरनेट रेडिओ रागिणीवरून विविध क्षेत्रातील वैद्यकीय तज्ज्ञांच्या सहभागावर आधारीत विशेष कार्यक्रमांचे प्रसारण करण्यात येणार आहे.
यामध्ये इंडियन मेडिकल असोसिएशनचे सदस्य सहभागी होणार असून ‘डॉक्टर्स डे’ बद्दल माहितीबरोबरच देशव्यापी कार्यरत असणाऱ्या इंडियन मेडिकल असोसिएशनची माहिती व सामाजिक कामाची माहिती दिली जाणार आहे. याखेरीज कोरोना अन् संसर्गजन्य परिस्थिती, कोरोना काळातले मानसिक आरोग्य, मास्क वापरण्याच्या पद्धती, कोरोना काळात घ्यावयाची काळजी, कोरोना व मानसिक आरोग्य, कोरोना व बाल आरोग्य, कोरोना तपासणी आणि गैरसमज, त्वचेची निगा कशी राखावी, जेष्ठ नागरिकांचे आरोग्य, चाळिशीनंतरच्या महिला आरोग्य समस्या, आरोग्य विम्याविषयी नागरिकांनी घ्यावयाची दक्षता अशा अनेकविध विषयांवर मार्गदर्शन करणार आहेत.
या दिवसभराच्या प्रसारण सेवेत आयएमए चे माजी प्रदेशाध्यक्ष डॉ अशोक तांबे, आयएमए च्या शाखाध्यक्षा डॉ विभावरी सोळुंके यांच्यासह डॉ. अपर्णा घालमे, डॉ. स्नेहलता पवार, डॉ. दीपिका कोकणे, डॉ. सुजित अडसूळ, डॉ.आसावरी, डाँ. डोंबाळे, डॉ. संतोष घालमे, डॉ. आजिनाथ खरात, डॉ. हर्षवर्धन व्होरा, डॉ. दिनेश ओसवाल, डॉ. सौरभ मुथा या वैद्यकीय तज्ज्ञांच्या मुलाखतींचा समावेश आहे.
या कार्यक्रमाचे प्रसारण १ जुलै रोजी सकाळी ९ ते सायं ५ या वेळेत होणार असून श्रोत्यांना ते मोबाईलवर रेडीओ रागिणी अँपच्या माध्यमातून ‘डॉक्टर्स टॉक’ या सदरात ऐकायला मिळणार आहे.याचे नियोजन बारामती हॉस्पिटलचे संचालकडॉ.अमरसिंह पवार यांच्या संकल्पनेतून करण्यात आले आहे. ‘ कोरोना संसर्गजन्य काळात नागरिकांना आरोग्याबद्दल अधिकाधिक जनजागृती व्हावी, या अनुषंगाने या कार्यक्रमाचे प्रसारण करण्यात येत असल्याचे डॉ. विभावरी सोळुंके यांनी सांगितले. या कार्यक्रमाची निर्मिती रेडिओ रागिणीच्या संचालिका राजश्री आगम यांच्या मार्गदर्शनाखाली झाली. कार्यक्रमाच्या ध्वनीमुद्रणासाठी आर. जे. पूजा, आर. जे. सैजल यांनी निवेदक म्हणून काम पाहिले.
