अजित पवार यांची उपमुख्यमंत्रीपदी निवड झाल्यानंतर बारामतीकरांनी जंगी मिरवणूक काढत त्यांचा नागरी सत्कार केला.. या मिरवणुकीसह सत्कार कार्यक्रमादरम्यान एक युवक सर्वांच्या नजरेत भरत होता.. येणाऱ्या प्रत्येकाला तितक्याच अदबीनं भेटून, एवढ्या मोठ्या राजकीय कुटुंबातून असल्याचा कोणताही अविर्भाव या तरुणाच्या चेहऱ्यावर नव्हता.. इतकंच काय तर भेटायला येणाऱ्या युवकांना स्वतः भेटून त्यांना स्वतः सेल्फी काढून देत होता.. हा तरुण म्हणजे उपमुख्यमंत्री अजित पवार यांचे सुपुत्र जय पवार..! प्रचंड मोठी राजकीय पार्श्वभूमी असतानाही तितक्याच अत्यंत साधेपणानं वागणारा हा तरुण प्रत्येकाला आपला वाटत होता.. त्यामुळंच प्रत्येकाच्या तोंडून एक वाक्य येत होतं ते म्हणजे सीधासाधा : आपला जयदादा..!
२०१४ च्या विधानसभा निवडणुकीवेळी जय पवार यांनी बारामतीत काही दिवस प्रचार केला होता. जय पवार यांनी बारामती शहर आणि तालुक्यातल्या गावोगावी फिरून आपले वडील अजित पवार यांचा प्रचार केला. त्यावेळी साहजिकच अजित पवार यांचा मुलगा म्हणून युवक आणि नागरिकांमध्ये जय पवार यांच्याबद्दल आकर्षक होतं.. मात्र २०१९ च्या विधानसभा निवडणुकीत पूर्ण वेळ बारामतीत घालवत संपूर्ण शहर आणि तालुक्यात जय पवार हे अक्षरशः पायाला भिंगरी लावून प्रचार करताना दिसले.. इतकंच नव्हे तर त्यांच्यातला साधेपणा, प्रत्येकाशी अदबीनं वागण्याची पद्धतही लोकांना अनुभवायला मिळाली.. त्याआधी बारामतीत आलेल्या पुरानंतर जय पवार यांनी घरोघरी जाऊन पाहणी करून संबंधित कुटुंबियांना आधार देत त्यांच्यात सर्वसामान्यांविषयी असलेली आपुलकी दाखवून दिली. खरं तर राजकीय कुटुंबातल्या मुलांकडून अनेकदा अविर्भाव दाखवला जातो.. मात्र जय पवार याला अपवाद ठरले.. प्रचाराच्या निमित्तानं गावोगावी फिरताना जागा मिळेल तिथे बसून लोकांशी संवाद साधला.. सर्वसामान्यांसाठी भाजप सरकारचं धोरण कसं घातक आहे हे पटवून देतानाच लोकांच्या समस्याही त्यांनी जाणून घेतल्या.. त्यामुळं जय पवार यांचं वेगळेपण आपसूकच लोकांना अनुभवायला मिळालं.. एवढंच नाही तर जय पवार हे समोरच्या व्यक्तीनं सांगितलेल्या कामांबाबत तात्काळ निपटाराही करत होते..
अलीकडील काळात तरुणांचा राजकारणाकडे कल वाढतो आहे.. त्यातच जय पवार यांनीही सार्वजनिक आणि पक्षांच्या कार्यक्रमात हजेरी लावत तरुणांशी संवाद सुरु केलाय.. तरुणांना राजकारणात व्यासपीठ मिळावं यासाठी ते प्रयत्नशील आहेत… त्यामुळं राजकारणातील एक आश्वासक चेहरा म्हणून जय पवार यांच्याकडे पाहिलं जातंय.. नुकत्याच झालेल्या अजित पवार यांच्या नागरी सत्कार सोहळ्यावेळीही जय पवार यांनी उपस्थिती लावली.. या कार्यक्रमात जय पवार यांच्यातला साधेपणा प्रत्येकाचं लक्ष वेधून घेत होता.. अनेक तरुण सेल्फीसाठी जय पवार यांच्याभोवती गराडा घालत होते.. जय पवार यांचाही या तरुणांना अगदी सहजपणे प्रतिसाद मिळत होता. त्यामुळंच की काय प्रत्येकजण एकच भावना व्यक्त करत होता ती म्हणजे सीधासाधा : आपला जयदादा..!
