बारामती : बारामती तालुक्यातील मुर्टी गावाजवळ ऊसतोड मजुरांना घेऊन जाणाऱ्या ट्रॅक्टरची ट्रॉली उलटून गुरुवारी (दि. १२) सायंकाळी भीषण अपघात झाला. या दुर्घटनेत एका महिला मजुराचा जागीच मृत्यू झाला असून, ट्रॉलीतील इतर अनेक मजूर गंभीर जखमी झाले आहेत.
मिळालेल्या माहितीनुसार, गुरुवारी सायंकाळी पाच वाजण्याच्या सुमारास ऊसतोड मजूर दोन ट्रॅक्टरमधून सातारा जिल्ह्यातील अजिंक्यतारा साखर कारखान्याकडे निघाले होते. मुर्टी गावाजवळ आल्यानंतर एका ट्रॅक्टर चालकाने पुढे असलेल्या ट्रॅक्टरला ओव्हरटेक करण्याचा प्रयत्न केला. मात्र, यावेळी दोन्ही वाहनांमधील अंतर चुकल्याने एका ट्रॅक्टरचे चाक दुसऱ्या ट्रॅक्टरच्या ट्रॉलीत अडकले. त्यामुळे चालकाचे नियंत्रण सुटून मजुरांनी भरलेली ट्रॉली रस्त्यावर उलटली.
अपघात झाला त्यावेळी या ट्रॉलीमध्ये सुमारे १५ ते २० ऊसतोड मजूर प्रवास करत होते. ट्रॉली अचानक उलटल्याने मजूर त्याखाली दबले गेले. या भीषण अपघातात एका महिलेचा जागीच मृत्यू झाला, तर इतर मजूर जखमी झाले आहेत.
अपघाताची माहिती मिळताच स्थानिक नागरिकांनी तातडीने घटनास्थळी धाव घेत मदतकार्य सुरू केले आणि ट्रॉलीखाली अडकलेल्या मजुरांना बाहेर काढले. सर्व जखमींना तात्काळ उपचारासाठी बारामती येथील रुग्णालयात दाखल करण्यात आले आहे. हंगाम सुरू होताच ऊसतोड मजुरांच्या वाहतुकीच्या सुरक्षेचा प्रश्न या घटनेमुळे पुन्हा एकदा ऐरणीवर आला आहे.
