बारामती : प्रस्तावित ‘महाराष्ट्र एपस्टीन फाईल्स’ या चित्रपटाच्या शीर्षकातून ‘महाराष्ट्र’ हे नाव वगळून चित्रपटाचे नाव बदलावे, अशी मागणी संभाजी ब्रिगेडच्या वतीने करण्यात आली आहे. या संदर्भात संभाजी ब्रिगेडच्या पुणे जिल्हा पश्चिम विभाग (बारामती) शाखेच्या वतीने आज बारामतीच्या नायब तहसीलदार शिंदे यांना निवेदन देण्यात आले.
काय आहे नेमकी भूमिका?
निवेदनात संभाजी ब्रिगेडने म्हटले आहे की, शिवराय, फुले, शाहू आणि आंबेडकरांच्या महाराष्ट्रात खरातसारखी भोंदू विकृती निर्माण होणे ही अत्यंत दुर्दैवी बाब असून, यातून शेकडो महिलांचे लैंगिक शोषण झाल्याचे समोर आले आहे. अशा घटना पुन्हा घडू नयेत, यासाठी समाजप्रबोधन व जनजागृतीच्या उद्देशाने चित्रपट निर्माण होत असेल तर त्याचे निश्चितच स्वागत आहे. मात्र, एका विशिष्ट गुन्हेगारी आणि लैंगिक शोषणाच्या प्रकरणावर आधारित चित्रपटाला ‘महाराष्ट्र’ हे नाव जोडणे, हा राज्याच्या पवित्र विचारांचा आणि अस्मितेचा अपमान आहे.”
राज्याच्या अस्मितेचा प्रश्न
महाराष्ट्र ही केवळ भौगोलिक सीमा नसून छत्रपती शिवाजी महाराज, छत्रपती संभाजी महाराज, राजर्षी शाहू महाराज, महात्मा फुले, सावित्रीबाई फुले आणि डॉ. बाबासाहेब आंबेडकर यांच्या विचारांचा गौरवशाली वारसा असलेली संतांची आणि शूरवीरांची भूमी आहे. अभिव्यक्तिस्वातंत्र्य आणि चित्रपट निर्मितीचे स्वातंत्र्य आम्हाला मान्य असले, तरी त्याचा वापर करताना राज्याच्या ऐतिहासिक व सांस्कृतिक प्रतिष्ठेला धक्का पोहोचणार नाही, याची काळजी घेणे आवश्यक आहे.
त्यामुळे या निवेदनाची गांभीर्याने दखल घेऊन चित्रपटाच्या शीर्षकातून ‘महाराष्ट्र’ शब्द वगळावा, अशी मागणी निवेदनाद्वारे करण्यात आली आहे. यावेळी संभाजी ब्रिगेडचे पुणे जिल्हाध्यक्ष विनोद जगताप, बारामती तालुकाध्यक्ष तुषार तुपे, शहराध्यक्ष सागर भोसले, तालुका संघटक आप्पासाहेब लोखंडे यांच्यासह इतर पदाधिकारी उपस्थित होते.
