नीरा नदीकाठचा भाग आता उन्हाळा सुरू होण्यापूर्वीच सुकत चालला आहे.. दुसरीकडे यावर्षी पाऊस झालेला नाही त्यामुळे प्रत्येक बंधाऱ्याच्या लगतचे शेतकरी पाण्यासाठी आसुसलेले आहेत.. अशा परिस्थितीमध्ये अधिकाऱ्यांनी पाण्याच्या नियोजनाच्या बैठकांमध्ये ठाम भूमिका घेतली आहे तीच ठाम भूमिका राहिली नाही तर इंदापूर तालुक्यात पाण्यासाठी आंदोलने आणि प्रतिआंदोलने होतील.. कारण इंदापूरच्या पूर्व भागातील शेतकऱ्यांनी पाणी सोडण्यासाठी आंदोलनाची हाक दिली आहे, तर ती हाक ऐकून वरच्या भागातील शेतकरी अस्वस्थ झाले आहेत.. जर आमच्या वाट्याचे पाणी खाली सोडले आणि आमचे बंधारे मोकळे केले, तर आम्ही देखील आंदोलन करू अशा स्वरूपाची भूमिका हे शेतकरी मांडू लागले आहेत.
अशा प्रकारची परिस्थिती पहिल्यांदाच होत असून पाण्यासाठी शेतकऱ्यांमध्येच विविध गट निर्माण होऊ शकतात आणि त्यातून पाण्याचा प्रश्न आणखी गहन आणि गंभीर होऊ शकतो, त्यामुळे आहे ती पिके जगवणे याला प्राधान्य दिले पाहिजे आणि ज्या पद्धतीने कालवा सल्लागार समितीच्या बैठकीत नियोजन ठरले आहे, त्यानुसारच नियोजन झाले पाहिजे अशा स्वरूपाचा प्रतिवाद आता होऊ लागला आहे.
इंदापूर तालुक्यातील निरा नदीकाठचे शेतकरी उद्या राष्ट्रीय महामार्गावर चक्काजाम करणार आहेत. ते शेतकरी त्यांच्या पाण्यासाठी चक्काजाम करणार असले, तरी त्यांना अपेक्षित असलेले पाणी सोडण्यास मात्र नीरा नदीकाठच्या वरच्या शेतकऱ्यांचा विरोध आहे. सध्या निरा नदीतून पाणी निरा नरसिंहपुर ला सोडायचे म्हटले, तर ते शक्य आहे का असा प्रश्न उपस्थित केला जात आहे. दुसरीकडे आहे त्या बंधार्‍यातील पाणी खाली सोडू देणार नाही अशी शेतकऱ्यांची ठाम भूमिका आहे.
जर लोकाग्रहास्तव पाणी खाली सोडण्याचा निर्णय झाला तर आम्ही देखील प्रतिआंदोलन करू अशी भूमिका माळेगाव, सोमेश्वर आणि छत्रपती सहकारी साखर कारखान्याच्या कार्यक्षेत्रातील शेतकऱ्यांनी व्यक्त केली आहे.
