बारामती : प्रत्येक दिवाळी पाडव्याला ज्या हक्काच्या पाठीराख्याच्या भेटीसाठी पावले विद्या प्रतिष्ठानकडे वळायची, त्या वाटेवर आज शब्द मुके झाले असून डोळे पाणावले आहेत. दिवंगत उपमुख्यमंत्री अजितदादा पवार यांच्या निधनानंतरची ही पहिलीच पाडव्याची पहाट बारामतीकरांसाठी आणि विशेषतः त्यांच्या प्रेरणेने प्रशासकीय सेवेत पोहोचलेल्या लेकरांसाठी अतीव वेदनादायी ठरत आहे.
ग्रामीण भागातील सर्वसामान्य कुटुंबातील तरुणांना अधिकारी होण्याचे स्वप्न दाखवून ते सत्यात उतरवणारा हा आधारवड हरपल्याने, देशभरात विविध उच्च पदांवर कार्यरत असलेले बारामतीचे अधिकारी-कर्मचारी मंगळवारी दि. १० नोव्हेंबर रोजी विद्या प्रतिष्ठान येथील दादांच्या स्मृतिस्थळावर एकत्र येत आहेत. सायंकाळी ५ वाजता पाडव्यानिमित्त ‘एक दीप कृतज्ञतेचा’ प्रज्वलित करून ते आपल्या लाडक्या नेत्याच्या चरणी भावपूर्ण आदरांजली अर्पण करणार आहेत.
बारामतीसारख्या ग्रामीण मातीत जन्मलेल्या हजारो युवक-युवतींना स्पर्धापरीक्षेच्या माध्यमातून वर्ग १ आणि वर्ग २ च्या शासकीय सेवेत पोहोचवण्यात अजितदादांचा वाटा केवळ नेत्याचा नव्हता, तर एका कणखर कुटुंबप्रमुखाचा होता. विद्यार्थ्यांना अद्ययावत अभ्यासिका, सुविधा आणि मार्गदर्शन उपलब्ध करून देण्यापासून ते थेट प्रशासकीय सेवेत रुजू झाल्यानंतर त्यांच्या पाठीशी खंबीर ढाल बनून उभे राहण्यापर्यंत दादांनी प्रत्येक पावलावर साथ दिली.
दिवाळीच्या पाडव्याला दादांना भेटून त्यांच्याकडून कौतुकाची थाप मिळवणे हा या अधिकाऱ्यांचा दरवर्षीचा हक्काचा क्षण असायचा; मात्र यंदा तो प्रेमळ हात पाठीवर नसून केवळ त्यांच्या पवित्र आठवणी उरल्या आहेत. हीच कृतज्ञतेची आणि दुःखाची भावना मनात साठवून, ‘आपली बारामती, आपली माणसं’ या समूहाच्या वतीने या अभिवादन उपक्रमाचे आयोजन करण्यात आले असून, दिवाळीच्या सुट्टीनिमित्त गावी परतलेल्या सर्व शासकीय अधिकारी व कर्मचाऱ्यांनी या भावनिक क्षणाचे साक्षीदार होण्यासाठी उपस्थित राहावे, असे आवाहन करण्यात आले आहे.
