ज्ञानेश्वर रायते, बारामती
कसं काय पाटील बरं हाय का? आज काय ऐकलं ते खरं हाय का? मंडळी, पाच वर्ष झालं गळा फोडतोय.. लोकशाही संपल्याचा गजर करतोय.. कुणीच इकडं फिरकत नाही.. म्हणून आज ही वेळ आली..! गोकुळाचा केला घात.. आज लोकशाही ओशाळली..सत्तेपुढे शहाणपण चालत नाही, तरीपण आता वाहतो शिव्यांची लाखोली..!
खरंतर सुरुवात त्यांनीच केली.. आम्हीच जिंकणार आम्हीच राजे असा भरवसा होता त्यांना, मग ते म्हणाले.. लोक हो, तुम्ही तर या लोकशाहीचे राजे.. असं म्हणत मग या राजाला बळंच घोड्यावर बसवलं.. दगा देईल अशी फिरकत होती, म्हणून काळजीनं शपथ घ्यायला लावलं..! तरीही झालाच दगाफटका तर? बरं पैसेही मोप वाटलं..! मग मंडळी, राजे आले मतदानाला.. गोठा होता गायीचा.. त्यांनी मोठा गेम केला.. खरंच आम्ही राजे म्हणत.. गोट्याऐवजी ‘घोडा’ आणि तबेला दाखवला.. ही कोल्हापूरची भूमी म्हणत, साऱ्यांनी चंग की हो हा बांधला.. एवढी सत्ता अघोरी तरी पाटलांचा बंटी जिंकला..!
मंडळी प्रकरण एवढ्यावर थांबलं नाही.. या देशात आणि राज्यात लोकशाही शिल्लक उरली नाही असं विरोधक छताडावर पिठून-पिटून सांगत असले, तरी अजूनही आमच्या डोळ्यावर झापड कायम आहे.. आणि म्हणूनच सत्तेतल्या शहाणपणाचे धाडस अजून वाढतेच आहे.. हरलो संपलं सगळं एवढं जरी माहित आहे तरीसुद्धा जिंकण्याची धुगधुगी अजूनही कायम आहे…एका गोकुळासाठी बऱ्याच क्लृप्त्या केल्या, तरी देखील डाव काही जमला नाही..पण ते म्हणाले , हातावर हात ठेवणं आमच्या धोरणात नाही..
तेवढ्यात बातमी वाचली.. लोकांनी नाकारलं, अन् बरीच आदळआपट करूनही आपला अध्यक्ष होत नाही.. म्हणून चक्क मंत्रीमंडळ अख्खं एकवटलं.. सगळे डाव फिस्कटले तरी सत्ता विस्कटू द्यायची नाही.. हे सगळ्यांना पटलं..आमचे लोक निवडून नसले आले म्हणून काय झालं? आमच्या हतात सत्ता आहे .. मग सगळ्यांनी मिळून या लोकशाहीचा बांडविस्तारा गुंडाळला.. सरकारी चार जण नेमले.. मतदानाचे अधिकार दिले.. आणि एकदाचा लोकशाहीचा मांडव विसर्जित केला..!
रांडीच्यांनो, आरं एका..एका दूध संघाचं काय करता, एवढं ते राजकारण? अरे कसला भस्म्या झालाय तुम्हाला? माझं ते माझ्या बापाचंच.. पण तुझं तेही माझ्या बापाचं.. एवढा राजा मदमस्त कसा झाला? अजूनही आहे हिम्मत आमच्या धमन्यांत.. अजून किती खाली घसरताय, तेच आम्हाला पाहायचंय; गोकुळ फक्त टोक आहे रे; अजून हिमनग बाकी हाय!
