मुंबई: महाराष्ट्राच्या राजकीय वर्तुळात सध्या तीव्र खळबळ उडवून देणाऱ्या ‘फ्रेंडशिप फाईल’ नावाच्या कथित ऑडिओ क्लिपवरून महाराष्ट्र नवनिर्माण सेनेचे अध्यक्ष राज ठाकरे यांनी राज्य सरकार आणि भारतीय जनता पक्षावर अत्यंत कडक शब्दांत तोफ डागली आहे.
समाजमाध्यमांवर व्हायरल झालेली ही २९ मिनिटांची क्लिप केवळ आर्थिक देवाणघेवाणीपुरती मर्यादित नसून, ती “थेट लोकशाहीचा खून आणि बलात्कार” असल्याचा गंभीर आरोप राज ठाकरे यांनी केला आहे. मुख्यमंत्री देवेंद्र फडणवीस यांनी या प्रकरणावर वेळ मारून नेण्यासाठी फॉरेन्सिक चौकशीचे कारण पुढे केल्याचा दावा करत राज यांनी सरकारला थेट आव्हान दिले आहे.
नेमका आरोप काय?
राज ठाकरे यांनी उपस्थित केलेल्या मुद्द्यांनुसार, या व्हायरल ऑडिओ क्लिपमध्ये भाजपचे पदाधिकारी, सोशल मीडिया सेलचे प्रमुख, राष्ट्रीय स्वयंसेवक संघाचे (RSS) ज्येष्ठ पदाधिकारी आणि स्वतःला निष्पक्ष म्हणवणारे काही यूट्यूब इन्फ्लुएन्सर्स यांच्यातील संभाषणाचा समावेश आहे. या संभाषणातून समोर आलेले गंभीर पैलू: ५०० कोटी रुपयांचे आर्थिक गैरव्यवहार: संभाषणात कोणी कोणाला ५०० कोटी दिले, यावर चर्चा ऐकायला मिळत आहे.
माध्यमांवर दबाव आणि दडपशाही: प्रसारमाध्यमांना कशी जरब बसवायची आणि सरकारविरोधी आवाज कसा दाबायचा, याचे नियोजन केले जात आहे. धार्मिक ध्रुवीकरणाचा वापर: एखादा भावनिक किंवा संवेदनशील मुद्दा सरकारच्या अंगाशी आल्यास लोकांचे लक्ष विचलित करण्यासाठी नवीन धार्मिक मुद्दा कसा रेटायचा, याची रणनीती यात आखली जात असल्याचा आरोप राज ठाकरे यांनी केला आहे.
फॉरेन्सिकच्या नावाखाली महाराष्ट्राला गोल फिरवू नका
मुख्यमंत्र्यांनी ही क्लिप बहुधा दोन वर्षांपूर्वीची असावी असा अंदाज वर्तवत फॉरेन्सिक अहवाल मागवल्याचे जाहीर केले होते. या भूमिकेचा समाचार घेताना राज ठाकरे म्हणाले, “फॉरेन्सिक अहवाल हा खून, बलात्कार आणि मोठ्या आर्थिक घोटाळ्यांच्या तपासात मागवला जातो. या क्लिपमधील संभाषण ऐकले तर समजतेच की हा लोकशाहीचा खून आणि बलात्कारच आहे. मुख्यमंत्र्यांना यातील गांभीर्य मान्य आहे हे बरे झाले; मात्र केवळ फॉरेन्सिक आणि तांत्रिकतेचा आधार घेऊन महाराष्ट्रातील जनतेला गोल गोल फिरवू नका.” त्याचबरोबर, मुख्यमंत्र्यांना या संभाषणाची पूर्वकल्पना नव्हती का? असा सवाल करत, “तुमच्या पाठीमागे नेमके काय सुरू होते हे आधी तपासा,” असा टोलाही त्यांनी लगावला.
सत्तेतील ‘शहा-काटशाहा’चे राजकारण?
ही ऑडिओ क्लिप नेमकी आताच का बाहेर आली आणि ती कोणी बाहेर काढली, यावर बोट ठेवत राज ठाकरे यांनी महायुती सरकारच्या अंतर्गत वादाकडे अंगुलीनिर्देश केला आहे. यात सरकारमधील अंतर्गत शह-काट’शहा’चे राजकारण स्पष्ट दिसत असल्याचे त्यांनी म्हटले आहे. मुख्यमंत्र्यांनी निष्पक्ष राहून कठोर कारवाई करावी, अन्यथा हा फॉरेन्सिक तपास केवळ स्वतःच्या फायद्यासाठी यंत्रणा वाकवण्याचा प्रकार ठरेल, असा इशारा देत राज ठाकरे यांनी या संपूर्ण प्रकरणाची सखोल आणि पारदर्शक चौकशी करण्याची मागणी केली आहे.
