हिंदू हिंदू” करत तुमच्या मनात धर्मांधता पेरणाऱ्या लोकांचा हेतू तुम्हाला ‘गुलाम’ बनवण्याचा

किरण माने, मराठी चित्रपट अभिनेते

“शिवरायांच्या कोसळलेल्या पुतळ्यावरून लक्ष हटवण्यासाठी हिंदू-मुस्लिम करा.” हे आहे या संगोट्यांचे हिंदुत्व आणि हे आहे यांचं शिवप्रेम ! जरांगेंनी पुरावे सादर करून ‘दूध का दूध पानी का पानी’ केलंय. याची चौकशी होईलच… पण ही गोष्ट साधी नाही. भरकटलेल्या हिंदू बहुजनांनो, आता तरी आपल्या धडावर आपलंच डोकं ठेऊन विचार करा. “हिंदू हिंदू” करत तुमच्या मनात धर्मांधता पेरणाऱ्या लोकांचा हेतू तुम्हाला ‘गुलाम’ बनवण्याचा आहे. त्यांच्या नादाला लागून आपल्या मुलाबाळांचं भविष्य विकू नका.

तुमचं हिंदू धर्मावर प्रेम आहे ना… मग साधा विचार करा… अंतरवाली सराटीत हिंदू भावाबहिणींवर क्रूर लाठीहल्ला झाला होता तेव्हा कुठं गेलं यांचं हिंदुत्व??? कोरटकर सारखा संगोटा शिवरायांना, शंभूराजांना अश्लील शिव्या देतो तेव्हा का उमाळा येत नाही यांना हिंदुत्वाचा?? शिवशंभू आणि जिजाऊ मातेविषयी अपशब्द वापरणाऱ्या कोरटकरच्या ठिकाणी कुणी मुस्लिम असता, तर यांनी तुम्हाला हाताशी घेऊन महाराष्ट्र पेटवला असता…

‘शिवद्रोह करणारे कोरटकर, सोलापूरकर, छिंदम अजून तुमच्या संरक्षणाखाली मजेत कसे? असा जाब हिंदूंच्या वतीनं कधी विचारला त्यांनी???…या कावेबाजांनी तुम्हाला हाताशी धरून आपलं हिंदुत्व एका राजकीय संघटनेच्या दावणीला बांधलं आहे, हे लक्षात घ्या.

मराठा बांधव उभे राहीले की ओबीसी बांधवांना फूस लावतात आणि मातंग बांधवांना आपल्याच सख्ख्या भावाविरूद्ध लढवतात हा डाव कशासाठी सुरू आहे हे जर तुम्हाला कळाले नाही… तर तुम्ही या नीच मनुवाद्यांसाठी आपल्याच खर्‍या हिंदू धर्माचे लचके तोडाल. आपला हिंदू धर्म इतका लेचापेचा नाही की तो तारण्यासाठी कुणा टुकार राजकीय नेत्याची गरज असावी. उलट राम मंदिरात यांनी केलेल्या चोरीनं जगात आपली बदनामीच झाली आहे.

हिंदू धर्म जगात भारी ठरवायचा आहे ना? तर मग “पंढरीसी नाही कोणा अभिमान… पाया पडती जन एकमेकां” हा संदेश जगापर्यंत पोहोचवा… ‘ज्ञानोबा- तुकारामा’चा धर्मच जगात आपली मान ताठ करणार आहे. माणसाची जातधर्म न बघता “माऊलीS” म्हणत त्याच्या पाया पडणारा आपला धर्म आहे, हे जर जगाला कळलं, तर अख्खं जग हिंदू धर्माला काळजात स्थान देईल. आपला “चांगभलंS” हा गजर जगाचं चांगलं चिंतणारा आहे हे कळलं तर, जोतिबाचा गुलाल आणि खंडोबाचा भंडारा उधळण्याचा सोहळा सगळं जग बघेल.

जरांगेंनी सादर केलेल्या फोन मध्ये बोलणार्‍या व्यक्ती कोण आहेत याच्याशी मला देणंघेणं नाही… त्या व्यक्ती ज्या ‘विचारधारेच्या’ आहेत, ती वृत्ती आपल्या हिंदू धर्माची आणि छत्रपतींच्या स्वराज्याची दुश्मन आहे. ‘हिंदू खतरेमें’ असेल तर महाराजांच्या कोसळलेल्या पुतळ्याचा वापर, मुस्लिमद्वेष पसरवण्यासाठी करून घेणाऱ्यांमुळे आहे, हे मेंदूत कोरून ठेवा. पंढरीनाथ महाराज की जय!