बारामती : बारामती तालुक्यातील देऊळगाव रसाळ येथे विहिरीचे खोदकाम सुरू असताना अचानक माती व दगडांची मोठी दरड कोसळून दोन जणांचा जागीच मृत्यू झाल्याची अत्यंत दुर्दैवी घटना घडली आहे. दोघेही चुलते पुतणे आहेत. या भीषण दुर्घटनेमुळे संपूर्ण गावावर आणि परिसरात तीव्र शोककळा पसरली आहे.
मिळालेल्या प्राथमिक माहितीनुसार, देऊळगाव रसाळ येथील एका शेतात विहिरीचे खोदकाम सुरू होते. काम सुरू असताना अचानक वरून भराव आणि दडी थेट मच्छिंद्र रसाळ व अमोल रसाळ यांच्यावर कोसळली. हा ढिगारा इतका मोठा होता की, त्यांना बाहेर पडण्याची संधीच मिळाली नाही.
घटनेची माहिती मिळताच स्थानिकांनी तात्काळ घटनास्थळी धाव घेत बचावकार्य सुरू केले, मात्र ढिगाऱ्याखाली दबल्याने दोघांचाही जागीच मृत्यू झाला होता.मृतांची नावे : मच्छिंद्र रामचंद्र रसाळ (वय ५० वर्षे) अमोल धनाजी रसाळ (वय २६ वर्षे) अशी आहेत. एकाच कुटुंबातील दोघांचा अशा प्रकारे अकाली मृत्यू झाल्याने रसाळ कुटुंबीयांवर दुःखाचा डोंगर कोसळला असून, परिसरात हळहळ व्यक्त केली जात आहे. घटनेची माहिती मिळताच स्थानिक प्रशासनाने घटनास्थळी धाव घेतली आहे.
