सण साजरा करायचाय की इतरांचा जीव धोक्यात घालायचा? बारामती पोलिसांचा नियम मोडणाऱ्यांना कडक इशारा; मुंबई उच्च न्यायालयाच्या आदेशाची शहरात कडक अंमलबजावणी सुरू.
बारामती : महान्यूज लाईव्ह
सण-उत्सव म्हणजे आनंद, उत्साह आणि मांगल्याचे प्रतीक. मात्र गेल्या काही वर्षांत या आनंदाचे रूपांतर रस्त्यांवर होणारा कानठळ्या बसवणारा गोंधळ, डोळे दिपवणारे धोकादायक लेझर बीम्स आणि हवेत पसरणारे विषारी वायू यात झाले आहे. “आमचा सण, आमची मर्जी” अशा बेफिकिरीने वागणाऱ्यांना आता कायद्याचा सणसणीत दणका बसणार आहे. मुंबई उच्च न्यायालयाच्या कठोर आदेशानंतर बारामती शहर पोलिसांनी जाहीर नोटीस बजावत स्पष्ट केले आहे की सार्वजनिक रस्ते, चौक किंवा गल्लीबोळात फटाके वाजवले, बेकायदेशीर डीजे ठोकला किंवा धोकादायक लेझर लाईट्स चमकवल्या, तर थेट कायदेशीर कारवाई आणि साहित्य जप्ती होणार आहे.
मुंबई उच्च न्यायालयाचे न्यायमूर्ती गिरीश कुलकर्णी व न्यायमूर्ती डॉ. नीला गोखले यांच्या खंडपीठाने स्पष्ट निर्देश दिले आहेत की, हा आदेश केवळ एका सणापुरता मर्यादित नसून दिवाळी, दसरा, गणेशोत्सव यांसह वर्षभरातील सर्वच सणांना लागू आहे. अनेकदा उत्साहाच्या भरात मुख्य रस्त्यांवर, पादचाऱ्यांच्या अंगावर किंवा गाड्यांच्या चाकाखाली येतील अशा पद्धतीने फटाके फोडले जातात. यामुळे होणारे अपघात, भाजण्याच्या घटना आणि निष्पाप पादचाऱ्यांना होणारा त्रास आता खपवून घेतला जाणार नाही. रस्त्यावर फटाके फोडण्यास चोवीस तास पूर्ण बंदी असून सकाळचे सहा ते रात्री दहा ही वेळ रस्त्यावरील फटाकेबाजीसाठी कोणतीही मुभा देत नाही.
उत्सवाच्या नावाखाली रात्री उशिरापर्यंत अवाढव्य डीजे सिस्टीम वाजवणे, डोळ्यांचे कायमचे नुकसान करू शकतील अशा लेझर लाईटचा वापर करणे आणि रुग्णालये तसेच शाळांच्या आवारात दणदणाट करणे ही विकृती आहे, संस्कृती नव्हे. फटाक्यांच्या विषारी धुरामुळे दमा, श्वसनविकार आणि हृदयविकाराच्या रुग्णांचा श्वास गुदमरतो. भारतीय संविधानाच्या अनुच्छेद २१ अन्वये प्रत्येक नागरिकाला शांततेत आणि आरोग्यदायी वातावरणात जगण्याचा मूलभूत अधिकार आहे, तर अनुच्छेद ५१-अ (ग) नुसार पर्यावरणाचे रक्षण करणे हे प्रत्येक नागरिकाचे कर्तव्य आहे. त्यामुळे तात्पुरता आनंद कोणाच्या तरी जिवावर बेतणारा ठरू नये, याचे भान ठेवणे आवश्यक आहे.
या पार्श्वभूमीवर सार्वजनिक ठिकाणी, रस्त्यांवर, पदपथांवर आणि चौकांत फटाके फोडण्यास पूर्ण मज्जाव घालण्यात आला असून फटाके केवळ स्वतःच्या खासगी जागेत आणि ठरवून दिलेल्या मर्यादेतच वाजवावे लागतील. रात्री दहा ते सकाळी सहा या वेळेत आवाज करणारे फटाके वाजवल्यास थेट ध्वनीप्रदूषण कायद्यांतर्गत कारवाई होईल. याशिवाय रुग्णालये, शाळा, न्यायालये यांसारख्या शांतता क्षेत्रांच्या परिसरात फटाके, डीजे किंवा वाद्ये वाजवण्यावर सक्त बंदी घालण्यात आली आहे. डोळ्यांना इजा पोहोचवणाऱ्या अतितीव्र लेझर लाईट्स आणि विनापरवाना डीजे सिस्टीमवर थेट जप्तीची कारवाई केली जाणार असून फटाके विक्रेत्यांनी बेकायदेशीर साठा न करता केवळ कमी प्रदूषण करणाऱ्या हरित फटाक्यांचीच विक्री करावी, असे स्पष्ट निर्देश देण्यात आले आहेत.
बारामती शहर पोलीस प्रशासनाने बजावले आहे की, न्यायालयाच्या आदेशांचे उल्लंघन करणाऱ्यांवर कोणतीही गय न करता गुन्हे दाखल केले जातील आणि त्यांची यंत्रसामग्री जप्त केली जाईल. सण-उत्सव परंपरेनुसार, उत्साहात आणि इतरांच्या जिवाची काळजी घेऊन साजरे व्हावेत. नागरिकांना कुठेही अशा प्रकारे रस्त्यांवर फटाकेबाजी, कर्णकर्कश डीजे किंवा लेझर लाईटचा गैरवापर आढळल्यास त्यांनी स्वतः वाद न घालता तातडीने ११२ या क्रमांकावर किंवा बारामती शहर पोलिसांशी संपर्क साधावा. आपला आनंद दुसऱ्यासाठी संकट ठरणार नाही याची खबरदारी घेत सर्वांनी प्रदूषणमुक्त आणि सुरक्षित बारामतीसाठी सहकार्य करावे.
