दौलतराव पिसाळ, वाई : पुणे-सातारा महामार्गावरील जोशीविहीर महामार्ग पोलीस मदत केंद्रात कार्यरत असलेले पोलीस कॉन्स्टेबल संतोष रामदास ननावरे (वय ३५, रा. ओझर्डे, ता. वाई) यांनी पोलादपूर हद्दीत गळफास लावून आत्महत्या केल्याची धक्कादायक घटना आज पहाटे उघडकीस आली. या घटनेमुळे सातारा आणि रायगड पोलीस दलात मोठी खळबळ उडाली आहे. घटनास्थळी पोलिसांना एक सुसाईड नोट मिळून आली असून, आत्महत्येमागील नेमके कारण स्पष्ट करण्यासाठी पोलीस कसून तपास करत आहेत.
मिळालेल्या माहितीनुसार, संतोष ननावरे हे गेल्या तीन वर्षांपासून जोशीविहीर महामार्ग पोलीस मदत केंद्रात कॉन्स्टेबल म्हणून सेवेत होते. आपल्या मनमिळाऊ व कर्तव्यदक्ष स्वभावामुळे त्यांचा सहकाऱ्यांसह स्थानिकांमध्ये मोठा मित्रपरिवार होता. ते गेल्या ३० सप्टेंबरपासून रजेवर होते. आज पहाटेच्या सुमारास ते आपल्या चारचाकी वाहनातून पोलादपूर परिसरात गेले होते. तेथेच एका झाडाला गळफास घेतलेल्या अवस्थेत त्यांचा मृतदेह आढळून आला.
घटनेची माहिती मिळताच स्थानिक पोलिसांनी तातडीने घटनास्थळी धाव घेत पंचनामा केला. झडतीदरम्यान त्यांच्या जवळ आत्महत्येची सविस्तर कारणे नमूद केलेले एक पत्र (सुसाईड नोट) पोलिसांच्या हाती लागले आहे. हे पत्र पोलिसांनी ताब्यात घेतले असून, त्या अनुषंगाने पुढील कायदेशीर तपास सुरू करण्यात आला आहे. कर्तव्यावर असलेल्या एका तरुण पोलीस कर्मचाऱ्याने अशा प्रकारे टोकाचे पाऊल उचलल्याने जोशीविहीर पोलीस केंद्रासह संपूर्ण वाई तालुक्यात हळहळ व्यक्त होत आहे.
