बारामती : महान्युज लाईव्ह
सगळ्या निवडणूका आपण जिंकतो, आता माळेगाव हा पवारसाहेबांच्या विचाराचा कारखाना म्हणून भारतात ओळख आहे, त्यामुळे माळेगाव कारखाना कोणत्याही स्थितीत ताब्यात आलाच पाहिजे असा निर्धार करा असे आवाहन उपमुख्यमंत्री अजित पवार यांनी आज बारामतीत केले.
राष्ट्रवादी पुरस्कृत निळकंठेश्वर पॅनेलच्या निवडणूकीसंदर्भात आज पवार यांनी राष्ट्रवादी भवन येथे मेळावा घेतला. या मेळाव्यात ते बोलत होते. यावेळी राष्ट्रवादीचे तालुक्यातील पदाधिकारी उपस्थित होते.
पवार म्हणाले,लोकसभेच्या निवडणूकीला बहिण, मुलीच्या नात्याने सुप्रियाला प्रचंड मतांनी विजयी करता. त्याबद्दल धन्यवाद द्यावेत तेवढे थोडेच. आमदारकीत तर देशामध्ये उच्चांक केला, जिल्हा परीषदांमध्येही चांगले काम होते. सरकार नसताना सर्व जागा बारामतीत तुम्ही विक्रमी मताधिक्याने निवडून दिल्या. सगळ्या निवडणूका आपण जिंकतो. मत्र 1997 मध्ये एकदा आणि मागे पाच वर्षापूर्वी एकदा दुर्दैवाने आपण सर्वांना समाधानी करू शकलो नाही, म्हणून तिथे पराभव झाला. मतदारांचा तो अधिकार आहे, आता मात्र गाफिल राहू नका. हलक्या कानाचे राहू नका. अनेक जणांनी उमेदवारी मागितली, काही ठिकाणी संधी देता आली नाही. शेतकरी संघटना, वंचित आघाडी यांनाही सामावून घ्यावे लागले. निवडणूक झाल्यानंतर कारखान्याचा सहावा गट मंजूर करून मिळेल. सरकारनियुक्त तीन जागा व स्विकृत जागा एक आहे. ट्रस्टमधील जागा यामुळे दहा मध्ये जिथे म्हणून संधी देता येईल, तिथे देऊच, शिवाय ज्या गावांमध्ये निळकंठेश्वर पॅनेलला एकतर्फी मतदान मिळेल, तिथे संधी देऊ. निळकंठेश्वर पॅनेल निवडून आणा, दुसर्‍या दिवशी वसंतदादा शुगर इन्स्टिट्यूटचे पथक पाठवून विस्तारीकरणातील चुका शोधून दुरुस्त करू.
पवार पुढे म्हणाले,खरेतर आपण राज्यात सत्तेवर आहोत. मी ठरवले तर कायद्याच्या चौकटीत राहून काही गोष्टी करू शकतो. मात्र आम्ही खालच्या पातळीला जात नाही. सत्तेचा गैरवापर हा विरोधकांना संपविण्यासाठी करीत नाही. आपल्या येथे चांगली लोकशाही आहे. कोणीही आपली मते मांडू शकतात. मात्र असे असले तरी आज काही हट्टी माणसे आमचेच खरे असे सांगण्याचा प्रयत्न करीत आहेत. भाव चांगला मिळाला असे सांगतात. भाव चांगला देताना बाळासाहेब तावरे यांनी सत्ता सोडताना आर्थिक स्थिती खूपच चांगली होती. आज मात्र माळेगावची स्थिती काय आहे? राष्ट्रवादीने प्रचारास सुरवात करून 224 रुपयांच्या मागे ठेवलेल्या दरावर आवाज उठवला, तेव्हा मग कुठे 224 रुपये देतो म्हणाले. गेटकेनला पैसे कमी देऊन सभासदांना अधिकचा दर देण्याची आवई त्यांनी दिली. वास्तविक पाहता गेटकेनमुळे ऊस उशीरा गाळप झाला, त्यामुळे टनेज घटले आणि उसाचा फटका बसला. मागील काळात निरा डाव्या कालव्याची भाजप सरकारने काय अवस्था केली, हे सर्वाना माहिती आहे. पाण्यासंदर्भात आता लगेच काही सांगत नाही. मात्र काळानुरुप कामे सुरू आहेत. ऊस उत्पादक सभासदांनी कष्टाने ऊस पिकवल्यानंतर चांगला कारखाना चालविण्याच्या दृष्टीने पॅनेल दिले आहे. आज राज्यात सरकार आपल्या विचारांचे आहे. समोरच्या पॅनेलने कितीही गप्पा मारल्या, तरीही प्रत्येक गोष्ट सहकार खात्याकडे येते. अडचणीचा काळ आहे, उद्या काहीही मदत करायची झाली, तर शासन निवडून येणार्‍या पॅनेलच्या विचाराचे असले की प्रश्न सहज सुटतात. महत्वाची गोष्ट म्हणजे माळेगावच्या सहवीजनिर्मिती प्रकल्पाला आपले शासन होते, तेव्हा प्रतियुनिट दराला 6.50 रुपयांचा करार केला. भाजपचे पाठीमागील पाच वर्षात राज्य होते, तर त्यांनी हा दर 4.24 रुपयांवर आणून ठेवला. तिथेच दोन रुपयांचा फटका बसला. आज माळेगावचा सहवीजनिर्मिती प्रकल्प चांगला चालत नाही. आपल्या विरोधी पॅनेलमधील लोकांनी कारखान्याला राष्ट्रवादीचे संचालक मंडळ कर्जबाजारी करताहेत म्हणून सहवीजनिर्मितीला विरोध केला. मात्र त्यांनी सत्तेवर येताच तोच सहवीजनिर्मिती प्रकल्प पुढे नेला. त्यांनी हट्टापायी विस्तारवाढ केली. तरी देखील मागील वर्षी हंगाम बंद होताना व आता चालू होताना काय स्थिती झाली हे सर्वांना माहिती आहे. विस्तारवाढ होताना ती नीटनेटकी झाली पाहिजे. पण चांगल्या पुरवठादारांकडून चांगल्या दर्जाची मशीनरी घेतली नाही. एकूणच माळेगाव कारखान्याचे विस्तारीकरण व अधुनिकीकरण फसले आहे.
- मी खासगी कारखानदारीचा पुरस्कर्ता कसा?
मी खासगी कारखानदारीचा पुरस्कर्ता आहे असा आरोप करतात. मात्र विलासराव देशमुखांच्या काळात सहकारी कारखान्याला परवानगी न देण्याचा निर्णय घेतला. तेव्हापासून हा निर्णय बदललेला नाही. म्हणून खासगी कारखाने निघाले. मी खासगी कारखान्यांचा पुरस्कर्ता कसा असेल? छत्रपतीच नाही, तर इंदापूर तालुक्यातील तीनपैकी छत्रपती जरा बर्‍यापैकी तरी आहे. इंदापूर कारखाना 9 हजार टनाने चालणारा आज 2 हजाराने चालतो. निरा-भिमाचे रिपोर्टही देत नाहीत. आम्ही गवगवा करीत नाही. मात्र जी जबाबदारी पार पाडतो. आज आम्ही मंत्रीमंडळातील बहुतेक जण साखर कारखानदारीशी संबंधित आहोत. तिथे काहीही विषय आला आणि साखर कारखानदारीविरोधातील मुद्दा आला, तर आम्ही तिथे विरोध करतो. पाठीमागील पाच वर्षात असे कधी घडले नाही. उर्जामंत्री, मुख्यमंत्री, अर्थमंत्री साखरेशी संबंधित नसणारे होते. मी सोमेश्वरच्या कामकाजावर लक्ष ठेवून आहे. आता सतत भाव देण्यासाठी बँकांकडे जायला लागू नये म्हणून स्वतःचा निधी तयार करून ठेवला आहे. कोणत्याही समस्येला सामोरे जाण्यासाठी तेथील परिस्थिती चांगली आहे. माळेगावमध्ये तसे आहे का याचा विचार करा.
अडीच हजारांनी पॅनेल निवडून द्या
पवार म्हणाले,` माळेगावच्या कार्यक्षेत्रातील सभासदांनी व सर्व गावांनी एकमताने मताधिक्य देऊन पॅनेल विजयी करा. एकजूठ दाखवून हे पॅनेल अडीच हजारांनी निवडून आले पाहिजे. गेल्या पाच वर्षात पवारसाहेब या कारखान्यावर गेलेले नाहीत. त्यांना या कारखान्यावर सन्मानाने न्यायचे आहे. ती जबाबदारी सर्वांची आहे आणि या कारखान्यातील सर्व त्रुटी दुरूस्त करायच्या आहेत, त्यासाठी हे पॅनेल प्रचंड मताधिक्याने निवडून द्या.`
