विक्रम वरे : महान्यूज लाईव्ह
बारामती : बारामती शहरातील क्रीडा संकुलासमोरील नीरा कॅनलमध्ये रविवारी घडलेल्या एका धक्कादायक घटनेत धाडसी युवकांच्या प्रसंगावधानामुळे एका तरुणीचे प्राण वाचले.वाहत्या पाण्याच्या कॅनलमध्ये उडी मारलेल्या तरुणीला वेळेत बाहेर काढण्यात यश आल्याने मोठी दुर्घटना टळली असून या युवकांच्या धाडसाचे बारामती परिसरात सर्वत्र कौतुक होत आहे.
रविवारी दुपारच्या सुमारास क्रीडा संकुल परिसरात नेहमीप्रमाणे नागरिकांची वर्दळ सुरू असताना अचानक एका तरुणीने नीरा कॅनलमध्ये उडी मारल्याची घटना घडली. कॅनलमध्ये मोठ्या प्रमाणात पाणी वाहत असल्याने आणि पाण्याचा वेगही अधिक असल्याने परिसरात एकच खळबळ उडाली. घटनेची माहिती मिळताच अनेक नागरिक घटनास्थळी जमा झाले. मात्र काही क्षणांसाठी उपस्थित नागरिकांनाही काय करावे हे सुचत नव्हते.
अशा गंभीर परिस्थितीत शिवराज शरद झांबरे आणि प्रेम अभिजीत काळे या दोन युवकांनी धाडस दाखवत क्षणाचाही विलंब न करता कॅनलमध्ये उडी घेतली. स्वतःच्या जीवाची पर्वा न करता त्यांनी पाण्यात झुंज देत तरुणीपर्यंत पोहोचण्याचा प्रयत्न केला. पाण्याचा वेग, खोली आणि परिस्थितीचे गांभीर्य लक्षात घेता हे काम अत्यंत धोकादायक होते.
मात्र दोघांनीही धैर्याने परिस्थितीचा सामना करत पाण्याबाहेर काढले. त्यानंतर या मुलीला उपचारासाठी दवाखान्यामध्ये ऍडमिट करण्यात आले. याचवेळी विशाल जाधव, संजय घोरपडे तसेच इतर उपस्थित नागरिकांनीही मदतीसाठी धाव घेतली. सर्वांच्या एकत्रित प्रयत्नांमुळे तरुणीला सुरक्षितरित्या पाण्याबाहेर काढण्यात यश आले.
वेळेत मदत मिळाल्यामुळे तिचे प्राण वाचले असल्याची माहिती समोर आली आहे.या घटनेनंतर परिसरात काही काळ तणावाचे वातावरण निर्माण झाले होते.मात्र युवकांच्या धाडसामुळे संभाव्य अनर्थ टळल्याने नागरिकांनी सुटकेचा निश्वास सोडला. आजच्या काळात अनेकजण संकटाच्या प्रसंगी केवळ प्रेक्षकाची भूमिका घेताना दिसतात. मात्र शिवराज झांबरे, प्रेम काळे तसेच मदतीसाठी धावून आलेल्या विशाल जाधव, संजय घोरपडे आणि इतर नागरिकांनी दाखवलेली सामाजिक बांधिलकी ही प्रेरणादायी ठरली आहे. त्यांच्या या साहसी कृतीमुळे एका तरुणीला नवजीवन मिळाले असून बारामतीकरांकडून या सर्वांचे कौतुक केले जात आहे.
