दौंड : महान्यूज लाईव्ह
दौंड तालुक्यातील देऊळगाव राजे येथे स्वाभीमानी शेतकरी संघटनेच्या कार्यकर्त्यांनी दूधाच्या दरात वाढ करावी या मागणीसाठी आज आंदोलन केले. यावेळी रस्त्यावर दूधाचा अभिषेक करत सरकारविरोधात घोषणाबाजी करण्यात आली.
स्वाभिमानी शेतकरी संघटनेचे अध्यक्ष माजी खासदार राजू शेट्टी यांनी काही दिवसांपूर्वी दुध दरात वाढ करण्याच्या मागणीसाठी आंदोलनाचा इशारा दिला होता. त्यानुसार आज दौंड तालुक्यातील देऊळगाव राजे येथे स्वाभीमानी शेतकरी संघटनेच्या कार्यकर्त्यांनी आक्रमक पवित्रा घेत आंदोलन केले. यावेळी एका कार्यकर्त्याला दुग्ध अभिषेक घालून सरकारच्या विरोधात जोरदार घोषणा देत आगळेवेगळे आंदोलन करण्यात आले.
दूध उत्पादक शेतकऱ्यांना दुधाला योग्य बाजार मिळाला पाहिजे अशी मागणी यावेळी करण्यात आली. तसेच शेतकऱ्यांच्या शेती मालास रास्त दर मिळावा, रासायनिक खते बी बियाणे यांची टंचाई दुर करून ते शेतकऱ्यांना बांधावर देण्याची व्यवस्था करावी अशा विविध मागण्या यावेळी करण्यात आल्या. संघटनेचे जिल्हा पदाधिकारी राजाभाऊ कदम यांच्या नेतृत्वाखाली हे आंदोलन करण्यात आले. या आंदोलनात परिसरातील दुध डेअरीचे मालक हरीभाऊ अवचर, मिलिंद नागवे, गणेश माने, अभिमन्यू गिरीमकर, दुध उत्पादक शेतकरी जनार्दन अवचर यांच्यासह शेतकऱ्यांनी मोठ्या संख्येने सहभाग घेतला.
