बारामती : महान्यूज लाईव्ह
बारामती शहरातील तांदुळवाडी हद्दीतील निर्मळवस्ती येथे बेकायदेशीरपणे किराणा दुकानात दारूची विक्री करणाऱ्यावर उपविभागीय पोलिस अधिकारी नारायण शिरगावकर यांच्या पथकाने कारवाई केली आहे. या कारवाईमध्ये ५० हजारांची देशी-विदेशी दारू जप्त करण्यात आली आहे. या प्रकरणी सतीश विष्णु लोंढे या इसमावर दारूबंदी कायदा आणि कोरोना नियमांचे उल्लंघन केल्याप्रकरणी बारामती तालुका पोलिस ठाण्यात गुन्हा दाखल करण्यात आला आहे.
याबाबत सविस्तर माहिती अशी की, बारामती शहरातील तांदुळवाडी परिसरातील निर्मळवस्ती येथे किराणा दुकानातून दारूची अवैधरीत्या विक्री होत असल्याची माहिती उपविभागीय पोलिस अधिकारी नारायण शिरगावकर यांना मिळाली होती. त्यानुसार त्यांनी आज आपल्या पथकासमवेत या दुकानावर छापा टाकला. त्यामध्ये सतीश लोंढे हा इसम आपल्या किराणा दुकानातून दारूची विक्री करत असल्याचे आढळून आले. या कारवाईमध्ये पोलिसांनी देशी-विदेशी प्रकारची ५० हजार ६८ रुपयांची दारू जप्त केली असून सतीश लोंढे याच्याविरोधात दारूबंदी कायदा आणि कोरोना नियमांचे उल्लंघन केल्याप्रकरणी बारामती तालुका पोलिस ठाण्यात गुन्हा दाखल करण्यात आला आहे.
अप्पर पोलिस अधीक्षक मिलिंद मोहिते यांच्या मार्गदर्शनाखाली करण्यात आलेल्या या कारवाईमध्ये उपविभागीय पोलिस अधिकारी नारायण शिरगावकर, पोलिस उपनिरीक्षक संदीप गोसावी, हवालदार सुरेश भोई, तानाजी गावडे, पोलिस नाईक रमेश केकाण, आप्पा दराडे, वैभव साळवे, गणेश काटकर, राहुल लाळगे, शरद गावडे, श्रीकांत गोसावी, लता हिंगणे, जयश्री गवळी यांनी सहभाग घेतला.
धाड टाकणाऱ्या सगळ्यांची नावे लिहून काय उपयोग ,लोकांना दोषी कोण आहे हे सांगा ना??