इंदापूर : महान्यूज लाईव्ह
इंदापूरमध्ये आज नव्याने तीन जणांना कोरोनाची लागण झाली आहे. त्यामध्ये उद्धट येथील कोरोनाग्रस्त रुग्णाच्या पत्नी आणि मुलीसह शहरातील एका पुरुषाचा समावेश आहे.
उद्धट येथे काल पुणे जिल्हा मध्यवर्ती सहकारी बॅंकेच्या अधिकाऱ्याला कोरोनाची लागण झाली होती. या रुग्णाच्या संपर्कातील पाचजणांची तपासणी करण्यात आली. त्यामध्ये या रुग्णाच्या पत्नीसह मुलीचा अहवाल पॉझिटीव्ह आला आहे. तर उर्वरीत तिघांचे अहवाल प्रतिक्षेत आहेत.
इंदापूर शहरातील बाब्रस गल्ली, कसबा येथेही नव्याने एक रुग्ण सापडला आहे. त्याच्यावर इंदापूरच्या कोव्हिड केअर सेंटरमध्ये उपचार सुरु आहेत. दुसरीकडे कळस येथील बहुचर्चित सरकारी अधिकारी आणि त्याच्या संपर्कातील एकाचा अहवाल निगेटिव्ह आल्याने प्रशासनाला दिलासा मिळाला आहे.
दरम्यान, उद्धट येथे तीन रुग्ण आढळल्याने इंदापूर तालुक्याच्या पश्चिम भागात चिंतेचे वातावरण निर्माण झाले आहे.
