इंदापूर : महान्यूज लाईव्ह
इंदापूर व बारामतीच्या राजकारणात व अर्थकारणात बदल घडवणाऱ्या छत्रपती कारखान्यात सध्या बरेच काही शिजते आहे. येत्या काही दिवसांत छत्रपती कारखान्यातील सत्तेचे हस्तांतर होऊन सत्तेची सूत्रे पृथ्वीराज जाचक यांच्याकडे येऊ शकतात, तशा संदर्भातील चर्चा सध्या सुरू असून हे प्रत्यक्षात साकार झाल्यास राजकारणाच्या गोळाबेरजेबरोबरच सोमेश्वरप्रमाणेच छत्रपतीही कूस बदलेल असेच संकेत मिळत आहेत.
छत्रपती कारखान्याच्या सद्यस्थितीबाबत सध्या कार्यक्षेत्रातील सभासदांमध्ये चिंतेचा सूर आहे, खुद्द उपमुख्यमंत्री अजित पवार देखील माळेगाव कारखान्याच्या निवडणूकीत हीच चिंता स्पष्टपणे व्यक्त केली होती. विद्यमान अध्यक्ष प्रशांत काटे व सहकारी संचालकांनी काटकसरीने कारखाना चालवला, अर्थात ऊस तोड मजूर कमी आल्याने हंगामातील अडचणी आल्या हेही त्यांनी स्पष्ट केले होते, मात्र त्याचबरोबर त्यांनी हा कारखाना पुन्हा पूर्वपदावर आणणार असल्याचे खात्रीने सांगितले होते. हा कारखाना माझा असून, हा कारखाना कसा उभारीला आणायचा व त्याला वैभव मिळवून द्यायचे याची आखणी मी केलेली असल्याचेही त्यांनी स्पष्ट केले होते.
सध्या अजित पवार राज्याचे उपमुख्यमंत्री आहेत, त्यांचा कामाचा व्यापही मोठा आहे, त्यामुळे या परिस्थितीत हा कारखाना याच हंगामात पूर्ण क्षमतेने गाळप करेल यासाठी अनुभवी प्रशासकाची निवड करण्यावर गांभिर्याने चर्चा सुरू आहे. दुसरीकडे गेली काही वर्षे सातत्याने विरोधात असलेल्या पथ्वीराज जाचक यांच्यावर सभासदांचा विश्वास असला तरी त्यांच्या हातात राजकीय सत्ता मात्र येत नाही, तीन निवडणूकांमध्ये सलगपणे यशाने हुलकावणी दिली आहे. सत्तेच्या व निवडणूकीच्या राजकारणात अजित पवार काहीही करून विजयश्री खेचून आणू शकतात हा सर्वांनाच विश्वास आहे. त्यामुळेच या कारखान्याच्या बाबतीत राजकीय जोडे बाजूला ठेवून तळमळीने विचार करण्याची गरज दोन्ही बाजूंसाठी महत्वाची आहे. त्यातूनच हा एक सहकारातील नवा पायंडा पाडला जाण्याची चिन्हे दिसू लागली आहेत.
छत्रपती कारखान्याची सूत्रे गेल्या काही वर्षांपासून विरोधात असलेल्या पृथ्वीराज जाचक यांच्याकडे सोपविण्याची चर्चा सुरू असून यासाठी बारामतीमधूनच आशेचा अमोल किरण दिसू लागला आहे. सध्या कार्यक्षेत्रात याचीच चर्चा सुरू आहे. अद्याप उपमुख्यमंत्री अजित पवार, राज्यमंत्री दत्तात्रेय भरणे किंवा अगदी खुद्द पृथ्वीराज जाचक यांनीही काहीही मत अथवा प्रतिक्रिया व्यक्त केलेली नाही, मात्र यासंदर्भात प्राथमिक स्तरावरील काही बैठका झाल्याची खात्रीलायक माहिती आहे.
दुसरीकडे येणारा हंगाम जिकीरीचा आहे, त्याचबरोबर हा हंगाम पूर्ण क्षमतेने पार पाडण्याचे आव्हानही आहे. मागील हंगामात पुरेशी तयारी असूनही ऊस तोड मजूर पुरेशा संख्येने नसल्याने हंगामात अडचणी आल्या, सध्या कारखान्यावर सहवीजनिर्मिती व विस्तारीकरणाचे कर्जही आहे, या साऱ्या स्थितीचा परिणाम ऊसदरावर होऊ लागला असल्याने कारखान्यात सत्तेचे हस्तांतर करून एक नवा इतिहास जन्माला घालण्याचीही प्रक्रिया सुरू आहे. तसेही कोरोनाच्या काळात कारखान्याच्या निवडणूका पुढे ढकलल्या गेल्या आहेत, अजूनही पुढे ढकलल्या जातील. मात्र निवडणूकीने कारखाना बेजार करण्याऐवजी सकारात्मक राजकारणाची नवी गोळाबेरीज कारखान्यासाठी शुभवर्तमान ठरू शकते.
पाठीमागे असेच विरोधात असलेल्या अमरसिंह घोलप यांना अचानकपणे राष्ट्रवादीत आणून त्यांना कारखान्यावर संचालकपदी नेमून त्यांच्याकडे कारखान्याची धुरा देण्यात आली होती. तसाच काहीसा प्रयोग यावेळीही केला जाण्याची शक्यता आहे. ही शक्यता उदयास आल्यास पवारांचे बेरजेचे राजकारण सहकाराच्या चळवळीला जिवंत ठेवण्यासाठी काळानुसार कायम असल्याचाही संदेश जाणार आहे. त्याचबरोबर छत्रपती कारखान्याचा सशक्त प्रवासही होण्याची शक्यता अधिक खात्रीशीर होणार आहे. या निर्णयाचे तात्कालीक परिणाम राजकीय वाटतील, मात्र कारखान्याच्या प्रकृतीसाठी हे परिणाम दिर्घकालीन दृष्ट्या महत्वाचे व फायदेशीर ठरू शकतात. जाचक यांना राजकीय निवडणूकीत अपयश आले असले तरी कारखान्याचा त्यांचा तौलनिक अभ्यास, प्रशासन कौशल्याची सर्वांनाच जाण आहे. जाचक यांनाही कारखान्याची स्थिती सुधारण्याची तळमळ आहे, या सर्वांचा एकोपा करून हे नवे समीकरण उदयास येऊ शकते अशी सध्या गृहीतके बांधली जात आहेत. छत्रपती कारखान्याबाबत उपमुख्यमंत्री अजित पवार, राज्यमंत्री दत्तात्रेय भरणे यांच्यासह पृथ्वीराज जाचक यांनीही ही नवी संकल्पना स्विकारल्यास इंदापूरच्या अर्थकारणातही नवे बदल होऊ शकतात. जाचक यांच्याकडेही काही जादूची कांडी असेल असे नाही, मात्र कुशल नेतृत्व ते नक्कीच कारखान्याला देऊ शकतात ही भावना आजही सभासदांमध्ये आहे. फक्त जाचक यांनीही दोन पावले मागे येऊन कारखान्याच्या हितासाठी अशा नव्या पर्यायांचा स्विकार करायला हवा व अजित पवार यांनीही ही नवी बेरजेची सहकारातील पध्दत रुजू करावी, तो राज्याच्या सहकाराचा नवा अध्याय असेल.
