राजेंद्र झेंडे,महान्युज लाईव्ह
दौंड : दौंड पोलीस ठाण्याच्या हद्दीत सुरू असलेल्या वेश्या व्यवसायावर पुणे ग्रामीण स्थानिक गुन्हे अन्वेषण शाखा आणि दौंड पोलिसांच्या संयुक्त पथकाने मोठी कारवाई केली आहे. या कारवाईत दोन बांगलादेशी ६ महिलांची सुटका करण्यात आली असून लॉज चालकाविरुद्ध गुन्हा दाखल करण्यात आला आहे.
दौंड कुरकुंभ रोड लगत बोरावकेनगर, गोपाळवाडी येथील दौंडचे ज्येष्ठ नेते नंदू पवार यांच्या ‘रिलॅक्स इन लॉजिंग’वर वेश्या व्यवसाय सुरू असल्याची गोपनीय माहिती पुणे ग्रामीण एलसीबीला मिळाली होती. त्यानुसार शनिवारी ( दि. ३०) रोजी या लॉजवर बनावट ग्राहक पाठवून खात्री करण्यात आली. लॉजमधील महिलांनी पैशांच्या मोबदल्यात शरीरसंबंध ठेवण्याची तयारी दर्शविल्याचे निष्पन्न झाले. यानंतर सायंकाळी ५ वाजण्याच्या सुमारास एलसीबी आणि दौंड पोलिसांच्या संयुक्त पथकाने लॉजवर छापा टाकला. यावेळी लॉजमध्ये ६ महिला आढळून आल्या.
याकारवाईत ५० रुपये किमतीची ‘जरूर’ कंपनीची ३ कंडोम पाकिटे आणि बनावट ग्राहकाला दिलेल्या ५०० रुपयांच्या २ नोटा असा मुद्देमाल जप्त करण्यात आला.
याप्रकरणी पोलीसांनी लॉजचालक मनोज अनिल पवार ( वय 35 , रा. फलटण, जि. सातारा ) हा सदर ठिकाणी वेश्या व्यवसाय चालवत असल्याचे समोर आल्याने त्याच्याविरुद्ध अनैतिक मानवी व्यापार प्रतिबंधक अधिनियम अंतर्गत दौंड पोलीस ठाण्यात गुन्हा नोंद करण्यात आला आहे. दरम्यान, या कारवाईत दोन बांगलादेशी, एक पश्चिम बंगाल व ३ महाराष्ट्रतील महिलांची सुटका करून त्यांना आवश्यक ती मदत व समुपदेशनासाठी पुढील कार्यवाही केली जात असल्याची माहिती पोलीसांनी दिली.
