बारामती : विद्या प्रतिष्ठानच्या शरदचंद्र पवार सेंटर ऑफ एक्सलन्स इन आर्टिफिशियल इंटेलिजन्स यांच्या वतीने आयोजित करण्यात आलेल्या ३ दिवसीय आणि ५ दिवसीय ड्रोन कार्यशाळा आयोजित करण्यात आल्या. यामध्ये राज्यभरातील विविध जिल्ह्यातील विद्यार्थ्यांनी भाग घेतला.
आधुनिक तंत्रज्ञानाची ओळख विद्यार्थ्यांना करून देत त्यांच्यात तांत्रिक कौशल्य विकसित करण्याच्या उद्देशाने या कार्यशाळांचे आयोजन करण्यात आले होते. ४ मे ते ६ मे २०२६ या कालावधीत ३ दिवसीय तर ४ मे ते ८ मे २०२६ या कालावधीत ५ दिवसीय कार्यशाळा पार पडल्या. पुणे, नाशिक आणि बारामती परिसरातील एकूण ५१ विद्यार्थ्यांनी या कार्यशाळांमध्ये सक्रिय सहभाग घेतला.
या उपक्रमाची संकल्पना प्राचार्य डॉ. सुधीर लांडे यांची होती. ड्रोन लॅब इन्चार्ज डॉ. राजवीर शास्त्री यांच्या मार्गदर्शनाखाली कार्यशाळेचे नियोजन करण्यात आले. कार्यशाळेचे समन्वयक म्हणून डॉ. श्रीकांत महाडिक यांनी समन्वयाची जबाबदारी सांभाळली. कार्यशाळेत विद्यार्थ्यांना ड्रोन तंत्रज्ञानाची मूलभूत माहिती, डीजीसीएचे नियम व मार्गदर्शक तत्त्वे, फिक्स्ड विंग व रोटरक्राफ्ट प्रणाली, ड्रोन असेंब्ली, व्हर्च्युअल लॅब प्रशिक्षण, सिम्युलेशन तसेच प्रत्यक्ष ड्रोन फ्लायिंगचे प्रशिक्षण देण्यात आले. सैद्धांतिक ज्ञानासोबत प्रत्यक्ष प्रात्यक्षिकांमुळे विद्यार्थ्यांना आधुनिक ड्रोन तंत्रज्ञानाचा प्रत्यक्ष अनुभव घेता आला.
या कार्यशाळेसाठी रिमोट पायलट प्रमाणित प्रशिक्षक डॉ. हाफिज शेख, श्री. मंदार मोरे, श्री. मयूर गावडे, सौ. रुपाली झारगड आणि श्री. चिन्मय गायकवाड यांनी योगदान दिले. विद्यार्थ्यांनी कार्यशाळेद्वारे ड्रोन असेंब्ली, सिम्युलेशन आणि प्रत्यक्ष ड्रोन उड्डाण यासंदर्भातील महत्त्वपूर्ण तांत्रिक कौशल्य आत्मसात केल्याचे सांगितले. भविष्यात ड्रोन, रोबोटिक्स आणि कृत्रिम बुद्धिमत्ता क्षेत्रात करिअर घडविण्यासाठी ही कार्यशाळा उपयुक्त ठरल्याची भावना विद्यार्थ्यांनी व्यक्त केली.
कार्यशाळेच्या समारोप प्रसंगी सहभागी विद्यार्थ्यांना प्राचार्य डॉ. सुधीर लांडे, प्रा. परशुराम चित्रगार, प्रा. राजवीर शास्त्री तसेच सर्व प्रशिक्षकांच्या उपस्थितीत प्रशस्तीपत्रकांचे वितरण करण्यात आले. ही कार्यशाळा यशस्वीरीत्या पार पाडण्यासाठी विद्या प्रतिष्ठान संस्थेच्या व्यवस्थापन मंडळाचे मार्गदर्शन मिळाले.
