घनश्याम केळकर, बारामती
महाराष्ट्राला संत ज्ञानेश्वरांचा वारसा आहे. ज्यांनी वयाच्या १७, १८ व्या वर्षी ज्ञानेश्वरीसारखा ग्रंथ रचला. याच अलौकिक बुद्धीमत्तेचा वारसा सांगणारा, वयाच्या १२ व्या वर्षी जेईई मेन्स ९९.९१ पर्सेंटाईलने उतीर्ण होणारा आग्र्याचा देवांश धनगर हा यावेळच्या भीमपुत्र आयडॉलचा सन्मानमूर्ती आहे.
देवांश ज्यावेळी शाळेत जात असे, त्यावेळी कोणताही शिक्षक त्याला शिकवू शकला नाही. त्यानंतर त्याला त्याच्या वडिलांनी घरीच कोडींग शिकवायला सुरुवात केली. ११ व्या वर्षी देवांश गावातील मुलांना मोफत कोडींग शिकवत होता. त्याने शेकडो मुलांना मोफत कोडींग शिकवले. वयाच्या १२ व्या वर्षी जेईई मेन्स ही देशातील करोडो विद्यार्थ्यांना अवघड वाटणारी परीक्षा ९९.९१ पर्सेंटाईलने क्रॅक केली.
त्यावेळस जेईई मेन्स उतीर्ण होणारा तो सर्वात लहान वयाचा मुलगा होता. आता तो बेनेट युर्निव्हरसिटी, नोएडा येथून ऑफलाईन तर आयआयटी, मंडी येथून ऑनलाईन बी.टेक करतो आहे. तिथेही तो सर्वांत लहान वयाचा विद्यार्थी असून ब्रॅंड अॅम्बेसेडरसारखे अनेक किताब मिळवत आहे.
वयाच्या १४ वर्षी त्याने बी. टेक चा सर्वात लहान वयाचा विद्यार्थी बनण्याचा मान मिळविला. पॅथॉन, डाटा सायन्स आणि जावा स्क्रीप्टमध्ये त्याने आताच विशेष प्रावीण्य मिळविलेले आहे. याच आधारावर त्याने अनेक अॅन्डॉईड आणि गेमींग अॅप्स तयार केले आहेत. अतीशय अवघड आणि क्लिष्ट गणीते सोडवणे हा त्याच्या मनोरंजनाचा भाग आहे. पुढे जाऊन अॅन्ड्राईड आणि रोबोटिक्स प्रोग्रॅमिंगमध्ये काम करण्याची त्याची इच्छा आहे. साध्या सोप्या गोष्टी करण्यापेक्षा जिथे बुद्धीला आव्हान असेल, अशा क्षेत्रात भविष्यात त्याला काम करायचे आहे.
त्याने वडिलांच्या मदतीने आपल्या गावात अॅकॅडमी सुरु केली असून, तो अॅबॅकस आणि कोडिंगचे शिक्षण मुलांना देत असतो. इंग्रज या देशावर ताबा मिळवतील हे त्या काळात ज्यांच्या लक्षात आले होते, त्या अशाच अलौकिक बुद्धीमत्तेच्या अहिल्यादेवी होळकर होत्या. देवांश याच अहिल्यादेवींचा वारसा सांगतो.
आज वयाच्या १६, १७ व्या वर्षीच त्याने अनेक पुरस्कार मिळविले आहेत. माध्यमांनी त्याच्यावर शेकडोने बातम्या, लेख लिहले आहेत. त्याच्या अनेक मुलाखती युट्युबवर उपलब्ध आहेत. पण अहिल्यादेवींप्रमाणेच देवांशही या प्रसिद्धी आणि संपत्तीच्या मोहात न गुंतता जास्तीत जास्त समाजासाठी काय करता येईल याच्या विचारात गुंग आहे.
असा हा देवांश धनगर भीमपुत्र आयडॉल २०२५ चा मानकरी आहे. हा कार्यक्रम २० एप्रिल रोजी बारामतीतील गदिमा सभागृहात आयोजित करण्यात आला आहे. बारामतीतील संविधान विचार मंचाच्या वतीने या कार्यक्रमाचे आयोजन करण्यात आले आहे.
भीमपुत्र आयडॉल २०२५ च्या सन्मानमुर्तींची बारामतीकरांशी अधिक चांगली ओळख व्हावी अशी आमची इच्छा आहे. यातून अनेकांना प्रेरणा मिळावी, अनेक प्रकल्प बारामतीत आकारात यावेत हा या सगळ्या उपक्रमामागचा हेतू आहे. यासाठी या सन्मानमुर्तींसोबत गटचर्चा किंवा संस्थेला भेट देण्याबाबतचे नियोजन आम्ही करत आहोत. आपणास या गटचर्चेत सहभागी होण्याची इच्छा असेल किंवा आपल्या संस्थेला भेट द्यायची असेल तर ९८८१०९८१३८ – घनश्याम केळकर या मोबाईल नंबरवर संपर्क साधावा.
