घनश्याम केळकर, बारामती
चार्टर्ट अकाऊंटट किंवा सीए या पदवीला देशात मोठी किंमत आहे. ही पदवी मिळाल्यानंतर अक्षरश: पैशात खेळता येते. पण याऐवजी या पदवीचा उपयोग समाजकार्यासाठी करणारे सीए शंकर अंदानी हे यावेळच्या भीमपुत्र आयडॉलचे मानकरी आहेत.
आपले मूळ घर आणि गाव नेसत्या कपड्यानिशी सोडायला लागणे यासारखे दुर्देव ते कोणते? पण देशाच्या फाळणीच्या वेळी लाखो सिंधी हिंदूंना आपले सिंध प्रांतातील घर, दार, मालमत्ता आहे तशी सोडून भारतात यावे लागले. हे लोक देशात जागोजागी पसरले. पण त्यातील बहुतेकांनी आपल्या कष्ट आणि हिंमतीच्या जोरावर पुन्हा या देशात आपले स्थान निर्माण केले.
शंकर अंदानींचे कुटुंबही अशाचपैकी एक होते. हे कुटुंब आजच्या अहिल्यानगरमध्ये स्थायिक झाले. शंकर अंदानींनीही त्यांच्या लहानपणी गरीबीचे चटके सोसले. यातून शिक्षण घेऊन सीए झाल्यावर त्यांनी या शिक्षणाचा उपयोग समाजासाठी केला.
आज ते ३६५ धार्मिक संस्थांचे मोफत ऑडिट करतात. यामध्ये मंदिरे, मशिदी, चर्च आणि गुरुद्वारा सामिल आहे. ५११ शेतकरी कंपन्या स्थापन करण्यासाठी त्यांनी सहकार्य केले आहे, ज्यामध्ये ५ लाखाहून जास्त शेतकरी सभासद आहेत. अनाथ आणि गरीब विद्यार्थ्यांसाठी अनाथालय, गोशाळा यासारखे अनेक सामाजिक उपक्रम त्यांनी सुरु ठेवले आहेत. हजाराहून जास्त बेवारस मृतदेहांवर अंत्यसंस्कार करण्यासाठी त्यांनी पोलिसांना मदत केली आहे. याखेरीज शैक्षणिक, सांस्कृतिक, आध्यात्मिक क्षेत्रातही त्यांचे मोठे योगदान आहे.
त्यांच्या व्यवसायात त्यांचे नाव आहे. अहिल्यानगरची महानगरपालिका, शिर्डी देवस्थानसारख्या अनेक नामंवत संस्थांचे ते सीए आहेत. राज्यातील एनजीओंना मार्गदर्शन करण्यासाठी त्यांनी आता एका राज्यस्तरीय संस्थेची स्थापना केलेली आहे. याव्दारे ते सीएसआर फंड मिळविण्यासाठी या एनजीओंना मदत करतात. या कामासाठी त्यांचे राज्यभर दौरे सुरु आहेत. त्यांना आजपर्यंत शेकडोंनी पुरस्कार मिळाले असून आंतरराष्ट्रीय नोबेल पुरस्कारासाठी त्यांचे नामांकन झाले आहे.
असे हे शंकर अंदानी भीमपुत्र आयडॉल २०२५ चे मानकरी आहे. हा कार्यक्रम २० एप्रिल रोजी बारामतीतील गदिमा सभागृहात आयोजित करण्यात आला आहे. बारामतीतील संविधान विचार मंचाच्या वतीने या कार्यक्रमाचे आयोजन करण्यात आले आहे.
भीमपुत्र आयडॉल २०२५ च्या सन्मानमुर्तींची बारामतीकरांशी अधिक चांगली ओळख व्हावी अशी आमची इच्छा आहे. यातून अनेकांना प्रेरणा मिळावी, अनेक प्रकल्प बारामतीत आकारात यावेत हा या सगळ्या उपक्रमामागचा हेतू आहे. यासाठी या सन्मानमुर्तींसोबत गटचर्चा किंवा संस्थेला भेट देण्याबाबतचे नियोजन आम्ही करत आहोत. आपणास या गटचर्चेत सहभागी होण्याची इच्छा असेल किंवा आपल्या संस्थेला भेट द्यायची असेल तर ९८८१०९८१३८ – घनश्याम केळकर या मोबाईल नंबरवर संपर्क साधावा.
