विक्रम वरे – महान्यूज लाईव्ह
ब्रिगेडीयर अमरदिप सिध्दू.. वयाची ६४ वर्षे गाठलेली.. वयाच्या ५४ व्या वर्षी दुर्धर कर्करोगाचा सामना करण्याची वेळी आली, तेव्हा आर्मी एव्हीएशन कॉर्प्सचे सदस्य आणि भारतीय लष्करातील दिग्गज असलेल्या ब्रिगेडीयर सिध्दू यांनी हा आजार कॉकपीटमधील नेहमीची आणीबाणीची परिस्थिती समजून त्या आजाराशी संघर्ष केला आणि त्यावर मातही केली.. एवढेच नाही, तर पुन्हा विमानही त्याच जोमाने उडवले.. त्यांची ही कहाणी ऐकताना बारामतीत विमान प्रशिक्षण घेणारे नवपायलटही रोमांचित झाले होते.
बारामतीतील कार्व्हर एव्हीएशनच्या वतीने ब्रिगेडीयर सिध्दू यांची भेट नव्या पायलट प्रशिक्षणार्थ्यांशी घडविण्यात आली. यावेळी सिध्दू यांनी आपल्या जीवनाचा संघर्ष नमूद केला, तेव्हा फक्त टाळ्यांचा कडकडाट होत होता. जवळपास 8 हजार फ्लाईंग तास आणि 53 प्रकारच्या विमाने उडविण्याचा मोठा अनुभव असलेले सिध्दू हे पायलट प्रशिक्षणार्थ्यांसाठी एक महत्वाचा केंद्रबिंदू ठरले.
सन 1965 आणि 1971 च्या भारत पाक युद्धादरम्यान भारतीय सैन्यासोबत उड्डाण केलेल्या विंटेज या भारत निर्मित पुष्पक विमानाचे नूतनीकरण करण्यात त्यांनी मोलाचे योगदान दिले. सन 2011 मध्ये आर्मी एव्हीएशन कॉर्प्स ( एएसी)च्या रौप्यमहोत्सवी वर्षाच्या निमित्ताने देशभरातील युद्धांशी संबंधित सर्व ऐतिहासिक हवाई तळांवर उड्डाण केले.
पुन्हा एकदा 1965 च्या युद्धाच्या सुवर्णमहोत्सवी उत्सवादरम्यान सप्टेंबर 2015 मध्ये अशीच मोहीम हाती घेण्यात आली. दरम्यान त्यांना सन 2014 मध्ये नॉन हॉजकिन्स लिम्फोमा असल्याचे निदान झाले. उदंड मानसिकता व उत्कट इच्छाशक्तीच्या जोरावर नऊ महिन्यांच्या उपचारानंतर कर्करोगावर यशस्वी मात करून ते पुन्हा उड्डाणे करू लागले.
यावेळी बारामतीत बोलताना ब्रिगेडिअर सिध्दू यांनी सकारात्मक राहून कॅन्सर वर विजय शक्य असल्याचे मत व्यक्त केले. झटपट श्रीमंत व सर्व अपेक्षा पूर्ण होण्याचे स्वप्न पुरे करताना तणाव निर्माण होतो, त्यामुळे कॅन्सर पेशी निर्माण होण्यास मदत होते. त्यामुळे जीवनात तणाव मुक्त राहण्याचा प्रयत्न करा असे ते म्हणाले.
यावेळी कार्व्हर एव्हीएशनचे संचालक नेव्हील भरूच्या, वरिष्ठ व्यवस्थापक प्रमेश पारेख, विमान प्रशिक्षक दीपांशू कुमार, माधवराज सिंग, अभियंता मयूर जगताप, अलोक ओझा, समनव्यक अधिकारी वैभव शहा, चंद्राणी रे आदी अधिकारी, प्रशिक्षणार्थी उपस्थित होते.
