विक्रम वरे : महान्यूज लाईव्ह
माळेगांव : शिवनगर विद्या प्रसारक मंडळ माळेगाव येथील इन्स्टिट्यूट ऑफ टेक्नॉलॉजी अँड इंजिनिअरिंग येथे शैक्षणिक वर्ष २०२६-२७ साठी डिप्लोमा अभियांत्रिकी प्रवेश प्रक्रियेला गती देण्यासाठी एफ.सी. (Facilitation Centre) केंद्र सुरू करण्यात आले असून, विद्यार्थ्यांना प्रवेश प्रक्रियेत सर्वतोपरी मदत उपलब्ध करून देण्यात येत आहे. प्रथम वर्ष डिप्लोमा तसेच थेट द्वितीय वर्ष डिप्लोमा प्रवेश घेणाऱ्या विद्यार्थ्यांसाठी हे केंद्र महत्त्वपूर्ण ठरणार आहे.
डिप्लोमा प्रवेश प्रक्रिया अधिक पारदर्शक, सुलभ आणि वेळेत पूर्ण व्हावी या उद्देशाने हे केंद्र कार्यरत करण्यात आले आहे. या केंद्रामार्फत विद्यार्थ्यांना ऑनलाइन अर्ज भरणे, अर्जातील माहिती तपासणे, आवश्यक कागदपत्रांची पडताळणी, गुणवत्ता यादी व केंद्रीकृत प्रवेश प्रक्रिया (CAP) संदर्भातील मार्गदर्शन अशा विविध सुविधा एकाच ठिकाणी उपलब्ध होत आहेत. त्यामुळे ग्रामीण भागातील विद्यार्थ्यांना प्रवेश प्रक्रियेतील तांत्रिक अडचणींवर मात करणे अधिक सोपे होणार आहे.
संस्थेचे प्राचार्य डॉ. एस. आर. शहा यांनी सांगितले की, विद्यार्थ्यांना प्रवेश प्रक्रियेदरम्यान कोणतीही गैरसोय होऊ नये यासाठी संस्थेने विशेष नियोजन केले आहे. प्रवेश प्रक्रियेतील प्रत्येक टप्प्यावर विद्यार्थ्यांना योग्य मार्गदर्शन मिळावे आणि कोणतीही त्रुटी राहू नये, यासाठी अनुभवी प्राध्यापकांची नियुक्ती करण्यात आली आहे.
प्रथम वर्ष डिप्लोमा प्रवेश समन्वयक प्रा. ए. एस. मोरे आणि प्रा. एस. जे. लाड यांनी विद्यार्थ्यांना आवाहन करताना सांगितले की, ऑनलाइन अर्ज भरताना अनेकदा छोट्या चुका होतात आणि त्याचा परिणाम प्रवेश प्रक्रियेवर होऊ शकतो. त्यामुळे विद्यार्थ्यांनी सर्व आवश्यक मूळ कागदपत्रांसह एफ.सी. केंद्राला भेट देऊन मार्गदर्शनाचा लाभ घ्यावा.
तर थेट द्वितीय वर्ष डिप्लोमा प्रवेश समन्वयक डॉ. व्ही. व्ही. तावरे आणि डॉ. व्ही. पी. गायकवाड यांनी विद्यार्थ्यांनी आपली पात्रता, गुणपत्रिका आणि इतर आवश्यक कागदपत्रे वेळेत तपासून घ्यावीत, असे सांगितले. अर्ज पडताळणी वेळेत पूर्ण केल्यास प्रवेश प्रक्रियेत होणारा संभाव्य विलंब टाळता येईल, असे त्यांनी स्पष्ट केले.
एफ.सी. केंद्रात विद्यार्थ्यांना ऑनलाइन अर्ज भरण्यास मदत, अर्ज व कागदपत्रांची तपासणी, गुणवत्ता यादी आणि सीएपी प्रक्रियेबाबत माहिती, प्रवेश निश्चिती प्रक्रिया तसेच संपूर्ण प्रवेश प्रक्रियेबाबत तांत्रिक सहाय्य उपलब्ध करून दिले जात आहे. संस्थेच्या वतीने विद्यार्थ्यांना आवाहन करण्यात आले आहे की, प्रवेश प्रक्रियेत कोणतीही अडचण टाळण्यासाठी सर्व आवश्यक कागदपत्रांसह वेळेत एफ.सी. केंद्राला भेट देऊन आपली प्रवेश प्रक्रिया पूर्ण करावी.
