तातडीच्या दुरुस्तीला लवकरच होणार सुरुवात
जामखेड : महान्यूज लाईव्ह
जामखेड तालुक्यातील खर्डा येथील फुटलेल्या मोहरी तलावाची धरण सुरक्षा आढावा समितीने प्रत्यक्ष भेट देऊन पाहणी केली. या तलावावर खर्डासह परिसरातील अनेक गावं पिण्याच्या पाण्यासह शेतीसाठी मोठ्या प्रमाणावर अवलंबून आहेत. पावसाळ्यात झालेल्या मुसळधार पावसामुळे धरणाच्या सांडव्यालगतचा भराव खचल्याने मोठ्या प्रमाणात भगदाड पडले होते. परिणामी तलावातील पाणी मोठ्या प्रमाणात वाहून गेले असून, याचा परिणाम स्थानिक जलसाठ्यावर आणि शेतीवर होत आहे.
या गंभीर परिस्थितीची दखल घेत आमदार रोहित पवार यांनी सातत्याने पाठपुरावा करून दुरुस्तीच्या कामाला गती देण्याचा प्रयत्न केला. त्यांच्या पाठपुराव्यानंतर धरण सुरक्षा आढावा समितीने घटनास्थळी भेट देत नुकसानीचे बारकाईने परीक्षण केले. यावेळी मुख्य अभियंता संजय चोपडे, कार्यकारी अभियंता प्रवीण घोरपडे तसेच निवृत्त अधीक्षक अभियंता शिवाजी बोलभट यांना स्थानिक पदाधिकाऱ्यांनी निवेदन सादर केले.
या निवेदनात मोहरी तलावाच्या दुरुस्तीचे काम तातडीने हाती घेण्याची जोरदार मागणी करण्यात आली. पाहणीदरम्यान राष्ट्रवादी काँग्रेस (शरदचंद्र पवार) पक्षाचे जामखेड तालुकाध्यक्ष विजयसिंह गोलेकर, कार्याध्यक्ष रामहरी गोपाळघरे, मोहरी गावचे उपसरपंच हनुमंत बारगजे, श्रीकांत लोखंडे, कृष्णा गोपाळघरे, सुहास गोलेकर, किसन सानप, स्वप्नील अंकुश, विकास खरात, जालिंदर सोनटक्के यांच्यासह अनेक पदाधिकारी, कार्यकर्ते आणि ग्रामस्थ मोठ्या संख्येने उपस्थित होते.
समितीने परिस्थितीची गांभीर्याने नोंद घेतली असून, दुरुस्तीचे काम तातडीने सुरू करण्यात येईल, असा विश्वास स्थानिकांनी व्यक्त केला आहे. या कामाचे टेंडर काढून लवकरात लवकर दुरुस्तीच्या कामाला सुरुवात होऊन जलसाठा सुरक्षित करण्यासाठी प्रभावी उपाययोजना होतील, अशी अपेक्षा नागरिकांकडून व्यक्त होत आहे.
