राष्ट्रवादीकडून भाजपला जळगावमधून धक्का देण्याची तयारी
मुंबई : महान्यूज लाईव्ह
माजी मुख्यमंत्री तथा विरोधी पक्षनेते देवेंद्र फडणवीस यांच्या कुरघोड्यांना कंटाळलेल्या एकनाथ खडसे यांचा राष्ट्रवादी कॉँग्रेसमध्ये प्रवेश होण्याची चिन्हे दिसू लागली आहेत. आज मुंबईत राष्ट्रवादी कॉँग्रेसचे अध्यक्ष शरद पवार, उपमुख्यमंत्री अजित पवार, प्रदेशाध्यक्ष जयंत पाटील यांनी जळगाव जिल्ह्यातील राष्ट्रवादीच्या आमदार आणि पदाधिकाऱ्यांशी याबाबत चर्चाही केल्याचे समजते. दरम्यान, एकनाथ खडसे यांच्याप्रमाणेच भाजपचे अनेक नेते राष्ट्रवादीच्या संपर्कात असल्याची माहिती पुढे आली आहे.
विधानसभा निवडणुकीत कन्या रोहिणी खडसे यांच्या पराभवाला देवेंद्र फडणवीस हेच जबाबदार असल्याचा आरोप करत एकनाथ खडसे यांनी अनेकदा त्यांच्यावर टीका केली. त्याचबरोबर पंकजा मुंडे यांनी बीड जिल्ह्यात आयोजित केलेल्या मेळाव्यातही एकनाथ खडसे यांनी प्रदेशाध्यक्ष चंद्रकांत पाटील यांच्यासमोरच फडणवीस यांच्यासह पक्षांतर्गत कुरघोड्यांबाबत आपले मन मोकळे केले होते. तेव्हापासून अनेकदा खडसे यांनी जाहीरपणे देवेंद्र फडणवीस यांच्यावर तोफ डागली.
दुसरीकडे, महाविकास आघाडीच्या माध्यमातून सत्तेत आल्यानंतर उपमुख्यमंत्री अजित पवार आणि प्रदेशाध्यक्ष जयंत पाटील यांच्यावर शरद पवार यांनी पक्ष सोडून गेलेल्या आणि पक्षात येवू इच्छिणाऱ्या नेत्यांची चाचपणी करण्याची जबाबदारी टाकली आहे. त्यानुसार भाजपला पहिला धक्का उत्तर महाराष्ट्रातून अर्थात एकनाथ खडसे यांचा राष्ट्रवादीत प्रवेश घडवून देण्याची तयारी करण्यात आली आहे. त्याच अनुषंगाने आज मुंबईत राष्ट्रवादीच्या प्रदेश कार्यालयात स्वत: शरद पवार यांच्यासह अजित पवार, जयंत पाटील यांनी जळगाव जिल्ह्यातील राष्ट्रवादीच्या आमदार आणि पदाधिकाऱ्यांशी चर्चा केल्याचेही समजते.
एकीकडे एकनाथ खडसे यांची वाढत असलेली नाराजी, भाजपमध्ये त्यांचे कमकुवत होत असलेले स्थान, फडणवीस यांच्याकडून होणारी गळचेपी या बाबी लक्षात घेत त्यांना राष्ट्रवादीत घेण्याच्या हालचाली सुरू झाल्या आहेत. त्याचवेळी भाजपचे अनेक मातब्बर नेतेही राष्ट्रवादीच्या संपर्कात असल्याची चर्चा होत आहे. दरम्यान, सध्यातरी राष्ट्रवादीने वेट अँड वॉचची भूमिका घेतल्याचे दिसत असले तरी पडद्यामागे अनेक घडामोडी घडत असल्याने लवकरच भाजपला मोठा धक्का बसेल का याकडेच राजकीय वर्तुळाचे लक्ष लागले आहे.
