इंदापूर शहर व परिसरातील गुन्हेगारी उध्वस्त करणार : पोलीस निरीक्षक तयुब मुजावर
सुरेश मिसाळ : महान्यूज लाईव्ह
कायदा सुव्यवस्था राखण्यास पोलीस कटीबद्ध असून इंदापूर शहर व परिसर गुन्हेगार मुक्त करायचं आहे,असे सांगत इंदापूर शहर व परिसरातील गुन्हेगारी उध्वस्त करणार असल्याचा इशारा इंदापूर पोलीस ठाण्याचे पोलीस निरीक्षक तयूब मुजावर यांनी दिला.
आज (दि.९) तक्रार निवारण दिनाच्या अनुषंगाने इंदापूर पोलीस ठाण्याचे पोलीस निरीक्षक तयूब मुजावर यांच्या मार्गदर्शनाखाली इंदापूर येथील शहा सांस्कृतिक भवन येथे पोलीस क्षेत्रातील प्रमुख पोलीस अधिकारी, बिट अंमलदार, कर्मचारी तसेच तालुक्यातील सर्व पोलीस पाटील, महिला दक्षता समितीच्या सदस्यांच्या समवेत तक्रार निवारण दिन कार्यक्रम पार पडला.
यामध्ये गावागावांतील बँक, सराफ कट्टा, यांच्या सुरक्षा बाबत, महिला व शिक्षण घेत असणाऱ्या मुलींना होणारा त्रास, अपराध व त्या विषयी घ्यावयाची दक्षता, गावागावात शांतता व सलोखा राहावा तसेच कोविड बाबत चर्चा करण्यात आली. त्याचप्रमाणे गावागावातील तक्रादार यांच्या समस्या बाबत माहिती घेऊन त्या सोडवण्यासाठी प्रयत्न केला गेला. तसेच दक्षता ठेवणे बाबतच्या सर्वांना सूचना देण्यात आल्या.
पोलीस निरीक्षक तयूब मुजावर म्हणाले की,कायदा सुव्यवस्था राखण्यास पोलीस कटीबद्ध असून इंदापूर शहर व परिसर गुन्हेगार मुक्त करायचं आहे. इंदापूर शहराचे व शहरातील मालमतेचे संरक्षण करणे पोलिसांची जबाबदारी असून दररोज गस्तीसाठी पाच ते सहा गाड्या फिरत आहेत. पोलीस खात्याचे काम चांगले आहे.
सध्या विद्यालय व महाविद्यालय सुरू झाल्याने अनेक मुलींच्या बाबतीत छेडछाडीची प्रकरणे घडताना दिसून येत आहेत.अशा प्रकरणाबाबत गांभीर्याने लक्ष देऊन छेडछाड करणाऱ्यांवर जरब बसवण्यासाठी त्यांच्यावर कायदेशीर असे गंभीर कारवाई करण्यात येईल. यामध्ये मुलगी अल्पवयीन असेल तर संबंधित व्यक्तीवर पोस्को अंतर्गत गुन्हा दाखल करण्याचा इशाराही यावेळी मुजावर यांनी दिला.
यावेळी सहाय्यक पोलीस निरीक्षक ज्ञानेश्वर धनवे व सहाय्यक पोलीस निरीक्षक नागनाथ पाटील यांनीही मार्गदर्शन केले. अनेक गावातील पोलीस पाटलांच्या गावातील तक्रारी मांडल्या. यावेळी पोलीस निरीक्षक मुजावर यांनी इंदापूर तालुक्यातील अनेक गावातील तक्रारी सोडवल्या. सूत्रसंचालन पवन भोईटे यांनी केले.
