बारामती : महान्यूज लाईव्ह
गेल्या काही दिवसांपासून सातत्याने राज्य सरकारवर टिका करणार्या राणेपितापुत्रांना नेटकर्यांनी घायाळ केले होते, मात्र आज आमदार रोहित पवार यांनी राणे यांना कुक्कुटपालन क्षेत्राच्या मदतीवरून जोरदार झटका दिला. साखर उद्योगास मदतीबाबत शरद पवार यांनी पंतप्रधानांना दिलेल्या पत्रावरून टिका केल्यानंतर रोहित पवार यांनी निलेश राणे यांच्या ट्विटला प्रत्युत्तर देताना पवारसाहेबांनी कुक्कुटपालनाला देखील मदत करण्याचे आवर्जून आवाहन केल्याचे नमूद करून राणे यांच्या वर्मी शब्दबाण सोडला आहे.
आमदार रोहित पवार हे कोरोनाच्या काळात सातत्याने राज्य सरकारची बाजू मांडत तसेच जनतेची बाजू सरकारपर्यंत पोचविण्याचे काम करीत आहेत. गेल्या काही दिवसांपासून विरोधकांनाही ते अंगावर घेत आहेत. अशातच काल माजी केंद्रीय कृषीमंत्री शरद पवार यांनी पंतप्रधान नरेंद्र मोदींना पत्र लिहून साखर उद्योगास आर्थिक मदत करावी असे आवाहन केले आहे. यासंदर्भात पवार यांनी केंद्र सरकारला सहा कलमी उपाययोजना सांगितली आहे. त्यावरून आज भाजप नेते निलेश राणे यांनी ट्विटरवर टिका केली.
राणे यांनी त्यांच्या ट्विटमध्ये साखर विषयावर किती पैसे महाराष्ट्रात खर्च झाले यावर ऑडिट झालं पाहिजे, साखर कारखाने करोडोंची उलाढाल करतात, राज्य सरकार, राज्य बँक, जिल्हा बँका सगळे साखर व्यवसायाला वर्षोनवर्षे साथ देत आलेत, तरी वाचवा? असे नमूद केले. त्याची त्वरीत दखल घेत आमदार रोहित पवार यांनी पलटवार करीत राणे यांना नाजूक परंतू जोरदार प्रत्युत्तर दिले. रोहित पवार यांनी त्यांच्या ट्विटरवर उत्तरादाखल, मी आपणास सांगू इच्छितो की, पवारसाहेबांनी साखर उद्योगासह कुक्कुटपालन उद्योगातील दुरवस्थेबाबतही केंद्राला पत्र पाठवून उपाययोजना सुचवल्या आहेत. साहेब प्रत्येक गोष्ट अभ्यासपूर्वक मांडत असल्यानेच पंतप्रधान नरेंद्र मोदीजीही त्यावर सकारात्मक विचार करतात. त्यामुळे काळजी नसावी. अशा शब्दांत त्यांनी पलटवार दिला आणि त्याची आज दिवसभर राज्यभर चर्चा झाली.
