बारामती : महान्यूज लाईव्ह
बारामती नगरपरिषदेच्या उपनगराध्यक्षपदी नगरसेविका तरन्नुम अल्ताफ सय्यद यांची निवड झाली आहे. आज झालेल्या विशेष सभेत ही निवड करण्यात आली. दरम्यान, उपनगराध्यक्षपदासाठी वेगवेगळी नावे चर्चेत असतानाच उपमुख्यमंत्री अजित पवार यांनी तरन्नुम सय्यद यांच्या नावावर शिक्कामोर्तब करत त्यांची या पदावर वर्णी लावली आहे.
बारामती नगरपरिषदेच्या उपनगराध्यक्षपदाच्या निवडीची विशेष सभा शरदचंद्र पवार सभागृहात पिठासीन अधिकारी नगराध्यक्षा पौर्णिमा तावरे यांच्या अध्यक्षतेखाली झाली. मुख्याधिकारी योगेश कडुसकर यांच्याकडे उपनगराध्यक्षपदासाठी तरन्नुम सय्यद यांचा एकमेव अर्ज दाखल करण्यात आला होता. त्यानुसार सय्यद यांची बिनविरोध निवड करण्यात आली.
यावेळी मावळते उपनगराध्यक्ष नवनाथ बल्लाळ आणि तरन्नुम सय्यद यांचा सत्कार करण्यात आला. राष्ट्रवादीचे शहराध्यक्ष इम्तियाज शिकीलकर, गटनेते सचिन सातव, महिला बालकल्याण सभापती सुहासिनी सातव, विरोधी पक्षनेते सुनील सस्ते यांच्यासह नगरसेवक, अधिकारी यावेळी उपस्थित होते.
