ज्ञानेश्वर रायते, बारामती.
त्यांचे वडील आजही एका साखर कारखान्यात फिडपंप मॅन म्हणून काम करतात. एका सामान्य साखर कारखाना कामगाराच्या या मुलाने उच्च शिक्षण घेत वित्तीय क्षेत्रात जबाबदारी सांभाळली. फायनान्स मॅनेजर म्हणून काम करता करता याच मुलाने वडिलांचे नाव आणखी मोठे करत आता थेट साखर कारखान्याच्या कार्यकारी संचालक पदावर आपले नाव कोरले आहे.. ही हनुमान उडी घेतली आहे, पंढरपूर तालुक्यातील करोळे गावच्या हनुमंत करवर यांनी!
राज्यातील सहकारी साखर कारखान्यांसाठी कार्यकारी संचालक पदाच्या नियुक्तीसाठी राज्य सरकारच्या माध्यमातून लेखी परीक्षा घेतली जाते व मुलाखतीमधील गुणपत्रकानुसार कार्यकारी संचालक निश्चित केले जातात. तालुक्यातील भवानीनगरच्या श्री छत्रपती सहकारी साखर कारखान्यामध्ये फायनान्स मॅनेजर म्हणून कार्यरत असणारे हनुमंत नवनाथ करवर यांची कार्यकारी संचालक (एमडी) पॅनललिस्ट मध्ये नियुक्ती झाली आहे.
कारखान्यात वित्तीय व्यवस्थापक म्हणून काम करता करता करवर यांनी केलेले या कामगिरीबद्दल कारखान्याच्या वतीने अध्यक्ष प्रशांत काटे, उपाध्यक्ष अमोल पाटील, माजी उपाध्यक्ष बाळासाहेब पाटील, संचालक अॅड. रणजित निंबाळकर, नारायण कोळेकर, राजेंद्र गावडे, रसिक सरक, बारामती पंचायत समितीचे माजी सभापती अशोक नवले, कामगार नेते युवराज रणवरे आदींच्या उपस्थितीत सत्कार करण्यात आला.
करवर हे छत्रपती कारखान्यात सन २०२० पासून वित्तीय व्यवस्थापन करत आहेत. करवर हे करोळे (ता. पंढरपूर) येथील मूळ रहिवासी असून आतापर्यंत त्यांनी माढा तालुक्यातील विठ्ठलराव शिंदे कारखाना, बबनराव शिंदे, शरयू अॅग्रो या कारखान्यात काम केले आहे.
यावर्षी ५० जणांना नव्याने कार्यकारी संचालक पदाची नियुक्ती झाली. त्यांचे वडील आजही श्रीपूर येथील पांडुरंग सहकारी साखर कारखान्यात फीडपंपमन म्हणून कार्यरत आहेत. एका सामान्य साखर कारखान्यातील कामगाराच्या मुलाने घेतलेली ही गरुड झेप त्यामुळेच कौतुकास्पद आहे.
