दौंड : महान्यूज लाईव्ह
दौंड शहरातील ज्येष्ठ नागरिक आणि प्रसिद्ध मुद्रांक विक्रेते विवेक शंकर गटणे (वय ७२) यांच्या आत्महत्या प्रकरणी दौंड पोलीस ठाण्यात तब्बल १३ जणांविरोधात आत्महत्येस प्रवृत्त केल्याचा गुन्हा दाखल करण्यात आला आहे. या प्रकरणामुळे दौंड शहरासह संपूर्ण तालुक्यात मोठी खळबळ उडाली असून, प्रकरणात राजकीय दबावाची चर्चा रंगू लागली आहे.
पोलीसांनी दिलेल्या माहितीनुसार, महादेव गल्ली, दौंड येथील रहिवासी विवेक गटणे यांनी सोमवारी (११ मे) राहत्या घरी गळफास घेऊन आत्महत्या केली होती. आत्महत्येपूर्वी त्यांनी एका वहीत १३ जणांची नावे लिहून ठेवली होती. या व्यक्तींच्या जाचाला आणि त्रासाला कंटाळून मी माझे जीवन संपवत आहे, असा उल्लेख त्यांनी त्या वहीत केला असल्याची माहिती समोर आली आहे.
या प्रकरणी अद्वैत गटणे यांनी दौंड पोलीस ठाण्यात फिर्याद दिली. फिर्यादीनुसार, आरोपींनी मागील वर्षभरापासून आमचे फायनान्स कंपनीतील कर्मचारी ओळखीचे आहेत असे सांगून विवेक गटणे यांच्याकडून वेळोवेळी पैसे, सोने आणि इतर मौल्यवान वस्तू घेतल्या. मात्र, त्या परत न करता उलट आर्थिक, मानसिक आणि शारीरिक त्रास दिल्याचा आरोप करण्यात आला आहे.
गुन्हा दाखल झालेल्यांची नावे
संजय भिमराव बारवकर, अरीफ शमशुद्दीन शेख, प्रकाश आबाजी भालेराव, अख्तर अहमद शेख, आदित्य सुधीर जगताप, शंकर रमेश वाघमारे, राजू भीमराव बारवकर तसेच शितोळे, सोनवणे, चोप्रा, कुलकर्णी (मॅडम), शिंदे आणि मुल्ला (मुंबई) यांच्याविरोधात गुन्हा दाखल करण्यात आला आहे. काही आरोपींची संपूर्ण नावे व पत्ते अद्याप स्पष्ट नसल्याचे पोलिसांनी सांगितले. या प्रकरणाचा तपास पोलीस उपनिरीक्षक रूपेश कदम करीत आहेत.
राजकीय वर्तुळात चर्चांना उधाण
विशेष म्हणजे, या गुन्ह्यात दौंडमधील विविध राजकीय पक्षांचे पदाधिकारी, माजी नगरसेवक, सावकार आणि काही उच्चभ्रू व्यक्तींची नावे समोर आल्याने शहरात चर्चांना उधाण आले आहे. त्यामुळे पोलीस तपासावर राजकीय दबाव येत असल्याचा आरोप नागरिकांकडून केला जात आहे.
दरम्यान याप्रकरणी आरोपींना अटक होणार का?, तपास निष्पक्षपणे होणार का? असे प्रश्न नागरिक उपस्थित करत आहेत. या प्रकरणात बड्या राजकीय नेत्यांच्या कार्यकर्त्यांची नावे समोर आल्याने पोलिसांवर दबाव टाकला जात असल्याची चर्चा सुरू आहे.
दरम्यान, पुणे ग्रामीणचे पोलीस अधीक्षक संदीप सिंह गिल यांनी या प्रकरणात स्वतः लक्ष घालून निष्पक्ष तपास करावा, अशी मागणी नागरिकांकडून होत आहे.
