सावधान! पुणे जिल्ह्यातील ४५ शाळा ‘अनधिकृत’; जिल्हा परिषदेकडून यादी जाहीर, पालकांना प्रवेश न घेण्याचे आवाहन!

पुणे : महान्यूज लाईव्ह

आगामी शैक्षणिक वर्षाचे वेध लागलेले असतानाच, पुणे जिल्हा परिषदेच्या शिक्षण विभागाने एक मोठी कारवाई केली आहे. सरकारची कोणतीही मान्यता नसताना बेकायदेशीरपणे सुरू असलेल्या पुणे, पिंपरी-चिंचवड आणि ग्रामीण भागातील तब्बल ४५ अनधिकृत शाळांची यादी प्रशासनाने प्रसिद्ध केली आहे. या शाळांमध्ये पालकांनी आपल्या पाल्यांचे प्रवेश घेऊ नयेत, असे स्पष्ट आवाहन जिल्हा परिषदेने केले आहे.

प्रशासनाचा कडक इशारा

जिल्हा परिषदेचे मुख्य कार्यकारी अधिकारी गजानन पाटील यांनी या प्रकरणी कडक पवित्रा घेतला आहे. ते म्हणाले की, जिल्ह्यातील या ४५ शाळा अनधिकृत असल्याचे निष्पन्न झाले आहे. यानंतरही जर या शाळा सुरू राहिल्या, तर संबंधित शाळा व्यवस्थापनासह त्या भागातील गटशिक्षणाधिकारी आणि क्षेत्रीय अधिकाऱ्यांवरही जबाबदारी निश्चित करून कारवाई केली जाईल.

कुठे किती शाळा अनधिकृत?

शिक्षणाधिकारी संजय नाईकडे यांनी दिलेल्या माहितीनुसार, अनधिकृत शाळांचे वर्गीकरण खालीलप्रमाणे आहे : पुणे महापालिका : १२ शाळा अनधिकृत आहेत. यातील ३ शाळांना केवळ ‘इरादा पत्र’ मिळाले आहे, मात्र अंतिम मान्यता मिळालेली नाही. पिंपरी-चिंचवड: ९ शाळा अनधिकृत आहेत. यातील एका शाळेकडे इरादा पत्र असले तरी अंतिम परवानगी नाही. या शाळांवर गुन्हे दाखल करण्याची प्रक्रिया सुरू आहे.

ग्रामीण भाग: २४ शाळा अनधिकृत आहेत. यात धक्कादायक बाब म्हणजे, ११ शाळांकडे मान्यता असली, तरी त्यांनी मूळ जागेवरून दुसऱ्या ठिकाणी ‘अनधिकृत स्थलांतर’ केले आहे. उर्वरित १३ शाळांकडे कोणतीही मान्यता नाही.

जिल्ह्यातील काही प्रमुख अनधिकृत शाळांची नावे : सेंट झेव्हिअर्स स्कूल (भोर), ओरिजनल मातोश्री इंग्लिश मीडियम स्कूल (सोरतापवाडी, हवेली), न्यू लिफ इंग्लिश मीडियम स्कूल (सरडेवाडी, इंदापूर), ईरा पब्लिक स्कूल (इंदापूर), अहिल्या इंग्लिश मीडियम स्कूल (काझड, इंदापूर), जयश्री इंग्लिश मीडियम स्कूल (ठाकूरवस्ती, सोळू, खेड), ज्ञानराज इंग्लिश मीडियम स्कूल (मरकळ, खेड), ज्ञानज्योत इंग्लिश मीडियम स्कूल (पद्मावती रस्ता, आळंदी, खेड),

छत्रपती शिवाजी राजे विद्यालय (आळंदी केळगाव रोड, खेड), हम्पी-डम्पी प्री स्कूल देव कृपा मॉल (वाडा रोड, खेड), सरस्वती विद्यालय (आळंदी केळगाव रोड, खेड), जीझस क्राइस्ट इंग्लिश मीडियम स्कूल (कामशेत मावळ), सनशाइन इंग्लिश मीडियम स्कूल (नवलाख उंबरे, मावळ), एंजल हाय (दत्तवाडी नेरे, मळशी), क्रिएटिव्ह इंटरनॅशनल स्कूल (जांबे, खेड),

श्री श्री रवीशंकर विद्यामंदिर (भूगाव, मुळशी), चाणक्य ज्युनिअर कॉलेज, पिरंगुट (मुळशी), सरस्वी क्लासेस (पिरंगुट मुळशी), एटिट इंटरनॅशनल स्कूल (कासार आंबोली, मुळशी), पेरीविकल इंग्लिश मीडियम स्कूल (पिरंगुट, मुळशी), श्रीनाथ इंग्लिश मीडियम स्कूल (वीर, पुरंदर), सेंट चावरा स्कूल (सरदवाडी, शिरूर).