विपुल पाटील, बारामती
सगळे बुवा किंवा भोंदू हिंदू धर्मातच आहेत असे नाही… मागील वर्षभरात लैंगिक शोषणाच्या आरोपाखाली मुस्लिम भोंदूनाही अंधश्रद्धा विरोधी कायद्याखाली अटक झाली आहे. ख्रिश्चन समाजातील काही पाद्रींवरती लैंगिक शोषण आणि असाध्य आजार बरे करण्याचे दावे केल्याच्या आरोपातून गुन्हे दाखल झाले आहेत. हे सुरुवातीला सांगण्याचे कारण म्हणजे धर्माचे तथाकथित रक्षक उगाच धर्माला मध्ये आणतात. आणि इतरांना उगाच धर्मविरोधी सिद्ध करण्याचा बाष्कळ प्रयत्न करतात.
तर मित्रांनो महाराष्ट्रभर या सर्व भोंदूनी नुसता उच्छाद मांडलाय. मध्यंतरी एका कॅप्टन महाराजाने ‘खुर्चीसाठी भांडणाऱ्या लोकांचे प्रश्न त्याच्याच टेबलावरती अगदी रसिकतेने सोडवले’ लोकांना मूत्रप्राशन करायला लावण्याचेही व्हिडिओ आले. तर दुसरीकडे निर्भय बाबा नावाच्या पुण्यातील एका भोंदूबाबाने बायकांचे पाय धुतले, पूजा केली.
स्त्रियांचा विश्वास जिंकला पण त्याला संमलैंगिकतेचा आजार असल्याने मोठमोठ्या नामवंत बिल्डर व्यवसाय करणाऱ्या पुरुषांचे मात्र लैंगिक शोषण केल्याचे त्यावर आरोप झाले. एका बाबाने तर कहरच केला ‘संसारातील अडीअडचणी व प्रश्न सोडवून देतो असे म्हणत एका व्यक्तीकडून 50 हजार रुपये घेतले आणि वरून त्या माणसाची बायको घेऊनच पोबारा केला..’ संसार संपला आणि संसारातल्या अडीअडचणी सुद्धा…
केवळ पुणेच नाही तर महाराष्ट्राच्या अनेक जिल्ह्यांमध्ये फसवणूक झालेल्या लोकांनी मागील काही दिवसात या भोंदू बाबांचे पितळ उघडे पाडले आहे. मागील एक महिन्यापासून तर वर्तमानपत्रे आणि न्यूज चैनलचे फुटेज याच लोकांनी राजकारण्यांपेक्षा जास्त खाल्ले आहे.
तर आजचा लेखन प्रपंच करण्याचे कारण म्हणजे. प्रत्येकाला आपआपल्या धर्मात चाललेल्या चुकीच्या गोष्टींवरती बोलण्याचा व त्यामध्ये सुधारणा सुचवण्याचा अधिकार आहे. एखाद्याने मांडलेला विचार दुसऱ्याने विचारातूनच खोडून काढला पाहिजे. परंतु ते होताना दिसत नाही.
सामाजिक चळवळीत काम करणारे विकास लवांडे यांनी वारकरी संप्रदायाबाबत आपले व्यक्तिगत मत मांडले. त्याला उत्तर म्हणून वैचारिक भूमिका न मांडता एका जमावाने त्यांच्यावर शाईफेक केली. ही घटना महाराष्ट्राच्या सामाजिक संस्कृतीला शोभणारी नाही. व्यक्त होण्याचा अधिकार कायद्याने सर्वांना दिला आहे. परंतु शारीरिक बळाचा वापर करून केलेली अशी कृत्ये निंदणी आहेत. आणि वरून त्याला अध्यात्मिक परंपरेचे लेबल लावणे चुकीचे आहे आहे, असे मला वाटते.
