पुणे : महान्यूज लाईव्ह
पुणे जिल्ह्यातील भोर नंतर आणखी एक प्रकरण उघडकीस आलं आहे. चाकण परिसरात घडलेल्या एका अत्यंत धक्कादायक आणि संतापजनक घटनेने परिसर हादरून गेला आहे. म्हाळुंगे दक्षिण पोलीस ठाण्याच्या हद्दीत तीन वर्षांच्या चिमुकल्यावर लैंगिक अत्याचार करून त्याची निर्घृण हत्या करण्यात आल्याची माहिती समोर आली आहे. या घटनेमुळे नागरिकांमध्ये तीव्र संतापाची लाट उसळली असून कायदा- सुव्यवस्थेबाबतही प्रश्नचिन्ह उपस्थित होत आहे.
प्राथमिक माहितीनुसार, या प्रकरणात १६ वर्षीय अल्पवयीन मुलाला पोलिसांनी ताब्यात घेतले आहे. आरोपी मूळचा बिहार राज्यातील असल्याचे समजते. मृत बालकाचे कुटुंब मध्य प्रदेशातील असून रोजगारासाठी चाकण परिसरात वास्तव्यास होते. घटनेनंतर पोलिसांनी तत्काळ हालचाली करत संशयिताला पकडले असून त्याच्याकडून अधिक चौकशी सुरू आहे.
विशेष म्हणजे, पुणे जिल्ह्यातील भोर तालुक्यातील नसरापूर येथे नुकतीच अशाच प्रकारची घटना घडून चार वर्षांच्या चिमुरडीवर अत्याचार करून तिची हत्या करण्यात आली होती. त्या घटनेची धग अद्याप शांत झालेली नसतानाच चाकणमधील ही घटना समोर आल्याने नागरिकांमध्ये भीतीचे वातावरण निर्माण झाले आहे. दरम्यान, पोलिसांकडून या प्रकरणाचा सखोल तपास सुरू असून आरोपीविरुद्ध कडक कारवाई करण्याची मागणी नागरिकांकडून होत आहे.
