नसरापूर (भोर): पुणे जिल्ह्यातील भोर तालुक्यातील नसरापूर येथे माणुसकीला काळीमा फासणारी एक अत्यंत धक्कादायक घटना समोर आली आहे. अवघ्या ४ वर्षांच्या चिमुकलीवर अत्याचार करून तिची दगडाने ठेचून हत्या करण्यात आली आहे. या प्रकरणी राजगड पोलिसांनी एका ६५ वर्षीय नराधमाला अटक केली असून, या घटनेमुळे संपूर्ण जिल्ह्यात संतापाची लाट उसळली आहे.
मिळालेल्या माहितीनुसार, पीडित बालिका सुट्ट्यांच्या निमित्ताने नसरापूर येथील आपल्या आजीकडे आली होती. शुक्रवारी दुपारी ती घरासमोर खेळत असताना आरोपी भीमा कांबळे (वय 60 रा. साळवडे ता. भोर) याने तिला आमिष दाखवून जवळच असलेल्या एका गुरांच्या गोठ्यात नेले. तिथे तिच्यावर अनैसर्गिक अत्याचार केल्यानंतर, तिने आरडाओरडा करू नये म्हणून आरोपीने दगडाने तिचे डोके ठेचून तिची निर्घृण हत्या केली. पुरावा नष्ट करण्याच्या हेतूने आरोपीने तिचा मृतदेह गोठ्यातील शेणाच्या ढिगाऱ्याखाली लपवून ठेवला होता.
मुलगी बेपत्ता झाल्याचे लक्षात येताच नातेवाईकांनी तिची शोधाशोध सुरू केली. परिसरात शोध घेऊनही मुलगी न सापडल्याने अखेर सीसीटीव्ही (CCTV) फुटेज तपासण्यात आले. यामध्ये ६५ वर्षांचा आरोपी मुलीला सोबत घेऊन जाताना स्पष्टपणे दिसला. संशयावरून पोलिसांनी आणि ग्रामस्थांनी संबंधित गोठ्याची झडती घेतली असता हा भयानक प्रकार उघडकीस आला.
नसरापूरमध्ये तणाव: महामार्गावर ‘रास्ता रोको’
या घटनेची बातमी वाऱ्यासारखी पसरताच नसरापूर परिसरात प्रचंड तणाव निर्माण झाला. संतप्त ग्रामस्थांनी आरोपीला आपल्या ताब्यात देण्याची मागणी करत पोलीस ठाण्याबाहेर गर्दी केली. नराधम आरोपीला जागेवरच फाशीचीच शिक्षा व्हावी, या मागणीसाठी शेकडो नागरिकांनी पुणे-सातारा महामार्गावर उतरून ‘रास्ता रोको’ आंदोलन केले. यामुळे महामार्गावरील वाहतूक काही काळ विस्कळीत झाली होती.
घटनेचे गांभीर्य ओळखून पुणे ग्रामीण पोलिसांनी नसरापूरमध्ये मोठा पोलीस बंदोबस्त तैनात केला आहे. पोलिसांनी आरोपीला तातडीने ताब्यात घेऊन अज्ञात स्थळी हलवले आहे. “हे प्रकरण अत्यंत गंभीर असून, आरोपीविरुद्ध पोक्सो (POCSO) आणि हत्येचे गुन्हे दाखल करण्यात आले आहेत. खटला जलदगती न्यायालयात चालवून आरोपीला कठोर शिक्षा मिळवून देण्यासाठी पोलीस प्रयत्नशील आहेत,” अशी माहिती पोलीस प्रशासनाकडून देण्यात आली.
