देहूरोडमध्ये गोळ्यांचा वर्षाव; भाजप कार्यकर्ते रमेश रेड्डी यांची भररस्त्यात हत्या!

पुणे : महान्यूज लाईव्ह

पुण्याच्या देहूरोड परिसरात काल रात्री घडलेल्या थरारक गोळीबाराच्या घटनेने शहरात भीती आणि संतापाचे वातावरण निर्माण केले आहे. भररस्त्यात अज्ञात हल्लेखोरांनी केलेल्या अंधाधुंद गोळीबारात मृत्यू झालेला तरुण हा भाजप कार्यकर्ते रमेश रेड्डी असल्याचे समोर आले असून या घटनेने गुन्हेगारीसह राजकीय वर्तुळातही मोठी खळबळ उडाली आहे.

माहितीनुसार रात्री उशिरा बाहेर असलेल्या रमेश रेड्डी यांना काही अज्ञात हल्लेखोरांनी लक्ष्य केले. कोणतीही वादावादी न करता थेट जवळून त्यांच्यावर गोळ्यांचा वर्षाव करण्यात आला. सलग गोळ्यांच्या आवाजाने परिसर दणाणून गेला. काही क्षणांतच रेड्डी रक्ताच्या थारोळ्यात कोसळले आणि घटनास्थळीच त्यांचा मृत्यू झाला. हल्लेखोर मात्र अंधाराचा फायदा घेत पसार झाले.

घटनेनंतर परिसरात भीतीचे वातावरण निर्माण झाले असून नागरिकांनी सुरक्षिततेबाबत गंभीर चिंता व्यक्त केली आहे. वर्दळीच्या भागात अशा प्रकारे खुलेआम गोळीबार होणे ही अत्यंत धक्कादायक बाब मानली जात आहे. या हत्येमागील कारणांचा शोध घेत असताना तपासाला धक्कादायक पार्श्वभूमी मिळाली आहे.

रमेश रेड्डी यांचे भाऊ विक्रम गुरुस्वामी रेड्डी यांची १३ फेब्रुवारी २०२५ रोजी अशाच प्रकारे गोळ्या झाडून हत्या करण्यात आली होती. अवघ्या एका वर्षाच्या आत रेड्डी कुटुंबातील दुसरी हत्या झाल्याने या दोन्ही घटनांमध्ये काही संबंध आहे का याचा तपास पोलिसांकडून सुरू आहे.

तपासादरम्यान आणखी एक महत्त्वाचा पैलू पुढे आला आहे. मागील काळात रमेश रेड्डी यांचा जुगाराशी संबंधित व्यवसाय असल्याची माहिती मिळत असून अलीकडे त्यांनी तो व्यवसाय बंद केला होता असे समजते. त्यामुळे भूतकाळातील व्यवहार, जुने संबंध किंवा संभाव्य वैर या हत्येच्या कारणांमध्ये गुंतलेले आहेत का याचाही तपास सुरू आहे.

पोलिसांनी या प्रकरणात जुना वाद, आर्थिक व्यवहार, वैयक्तिक वैर किंवा गुन्हेगारी टोळ्यांमधील संघर्ष या सर्व शक्यतांचा सखोल तपास सुरू केला आहे. मृत व्यक्तीच्या संपर्कातील व्यक्ती, त्यांचे अलीकडील व्यवहार आणि हालचालींचा मागोवा घेतला जात आहे. दरम्यान घटनास्थळाजवळील CCTV कॅमेऱ्यांमध्ये काही संशयित हालचाली कैद झाल्याची माहिती समोर आली आहे.

दुचाकीवरून आलेल्या संशयितांचा माग काढण्याचे प्रयत्न सुरू असून त्यावरून आरोपींची ओळख पटवण्याचे काम वेगाने सुरू आहे. घटनेनंतर पोलिसांनी तातडीने नाकाबंदी करत आरोपींचा शोध सुरू केला आहे. गुन्हे शाखेची पथकेही तपासात सहभागी झाली असून आरोपींना लवकरच अटक करण्यात येईल असा विश्वास व्यक्त करण्यात येत आहे.

या प्रकरणात खुनाचा गुन्हा दाखल करण्यात आला आहे. दरम्यान या घटनेने रेड्डी कुटुंबावर दु:खाचा डोंगर कोसळला आहे. एका भावाच्या हत्येचे दुःख अजून ओसरले नसतानाच दुसऱ्या भावालाही अशाच प्रकारे गमावण्याची वेळ आल्याने परिसरात हळहळ व्यक्त होत आहे.