राजेंद्र झेंडे,महान्युज लाईव्ह
दौंड : अहिल्यानगर ते मनमाड राष्ट्रीय महामार्गालगत असलेल्या आणि दौंड शहरालगत असलेल्या सोनवडी गावच्या लोखंडे वस्ती येथे शनिवारी पहाटे दोन बंगल्यात चोरट्यांनी दरोडा टाकून बंगल्यातील मौल्यवान सोन्या-चांदीचा ऐवज आणि रोख रक्कम चोरून नेल्याची घटना घडली.
याबाबत मिळालेली प्राथमिक माहिती अशी की, अहिल्यानगर मनमाड राष्ट्रीय महामार्ग लगत असलेल्या दत्तात्रेय सपकाळ यांच्या बंगल्यात दरोडा पडला. ओढ्याजवळ असलेल्या बंगल्याच्या बाजूचे लाकडी दार उचकटून दरोडेखोरांनी आत प्रवेश केला. खोलीमधील लाकडी कपाटाचे ड्रॉवर व लॉकरचे कुलूप तोडण्यात आले.
कपाटातील अंदाजे पाच तोळे सोन्याचे दागिने, चांदीचे दागिने व एक लाख रूपयांची रोकड चोरून नेली. तसेच शेतकरी असलेल्या सपकाळ यांची कांद्याची व कपाशीची पट्टी असलेली रोकडच चोरीला गेली आहे. बंगल्याच्या मागील बाजूच्या संरक्षक जाळ्याच्या लोखंडी तारा तोडून दरोडेखोरांनी गोदामात देखील उचका पाचक केली आहे.
ही सगळी घटना सीसीटीव्ही कॅमेऱ्यात कैद झाली. पाच तरूण बंगल्याच्या संरक्षक भिंतीवरून उडी मारताना दिसून येत आहेत. तोंडावर माकड टोप्या, हातात टॉर्च, अंगात जर्किन, काळ्या रंगाच्या पॅण्ट व शर्ट, असा त्यांचा पेहराव दिसून येत आहे. त्यांनी या वस्तीत असलेल्या सर्व बंगल्यांची आणि घरांची टेहळणी केल्याचे चित्रित झाले आहे.
तसेच लोखंडे वस्ती येथील शिक्षक हिरालाल शिंदे यांच्या दौंड नगरपालिका हद्दीतील बंद बंगल्यावर पाच दरोडेखोरांनी दरोडा टाकला. लोखंडी सुरक्षा दाराची त्रिस्तरीय रचना असलेले कुलूप तोडून व त्यानंतरचे लाकडी दार उचकटून दरोडेखोरांनी बंगल्यात प्रवेश केला. हॉल व आतील खोल्या मधील सर्व कपाटे, शोकेस, दिवाण मधील सर्व साहित्य दरोडेखोरांनी उचकले.
या बंगल्यातील सर्व चीजवस्तू दरोडेखोरांनी लंपास केल्या असून त्याचा तपशील उपलब्ध झालेला नाही. दौंड पोलिस ठाण्यात या प्रकरणी फिर्याद दाखल करण्याचे काम सुरू आहे. ही घटना शनिवारी ( दि १) मध्यरात्री २ ते ४ दरम्यान घडली. दरम्यान दौंड पोलीस ठाण्यात या प्रकरणी फिर्याद दाखल करण्याचे काम सुरू आहे.
