सुरेश मिसाळ : महान्यूज लाईव्ह
इंदापूर – विनाताबा साठेखत करून घेतलेल्या जमिनी व्यतिरिक्त अधिकच्या जमिनीत बेकायदेशीर उत्खनन केल्यावर शेत जमिनीच्या मालकाने याबाबत विचारणा केली असता त्यास जातीवाचक शिवीगाळ करून जिवे मारण्याची धमकी दिल्या प्रकरणी राष्ट्रवादी काँग्रेस पक्षाचे (अजित पवार गट) व आमदार दत्तात्रय भरणे यांचे खास समर्थक असलेले, इंदापूर तालुक्यातील वजनदार नेते दीपक जाधव यांच्यावर अनुसूचित जाती जमाती अत्याचार प्रतिबंधक कायद्यान्वये (ॲट्रॉसिटी) गुन्हा दाखल करण्यात आला आहे. यामुळे इंदापूर तालुक्यातील राष्ट्रवादीच्या गोटात खळबळ उडाली आहे. दरम्यान यासंदर्भात बारामतीच्या सत्र न्यायालयाने दिपक जाधव यांना अंतरिम जामीन मंजूर केला असून ७ ऑक्टोबरपर्यंत त्यांना अटक न करण्याचे आदेश दिले आहेत. ७ ऑक्टोबर रोजी याची सुनावणी आहे.
याबाबत सुभाष अर्जुन मिसाळ यांनी इंदापूर पोलीस स्टेशनमध्ये फिर्याद दिली आहे. त्यांच्या फिर्यादीवरून दिपक बाळासाहेब जाधव, दिनेश बाळासाहेब जाधव, बाळासाहेब जाधव (सर्व रा. गलांडवाडी,ता- इंदापूर, जि.पुणे) यांच्यावर अनुसूचित जाती जमाती अत्याचार प्रतिबंधक कायद्यान्वये गुन्हा दाखल करण्यात आला आहे. सुभाष अर्जुन मिसाळ यांच्या फिर्यादीवरून मिसाळ यांची यांची बेडशिंगे येथील गट नं- २३ मध्ये २ हेक्टर ८९ आर क्षेत्रापैकी ६० आर क्षेत्र हे दिनेश बाळासाहेब जाधव यांना दुय्यम निबंधक कार्यालय इंदापूर येथे विनाताबा साठेखत करून दिले होते. मात्र सुभाष मिसाळ यांना अचानक गाव कामगार तलाठी यांचा फोन आला व तात्काळ तुमच्या शेतातील गट नं-२२ मध्ये खोदकाम झाले आहे त्याचा पंचनामा करायचा आहे म्हणून तुम्ही शेतामध्ये यावे अशी माहिती दिली.
त्यानुसार मिसाळ हे बेडशिंग येथील शेतामध्ये आले असता साठेखत करून दिलेल्या क्षेत्रापैकी अधिकच्या क्षेत्रात मोठमोठे खड्डे खोदून त्यातील दगड, माती गायब असल्याचे दिसले. त्या नंतर गाव कामगार तलाठी, नायब तहसीलदार यांनी केलेल्या पंचनामा नुसार दिलेल्या माहितीवरून त्यांना असे समजले की ६० आर क्षेत्र व्यतिरिक्त अधिकच्या ६५ आर क्षेत्रामध्ये आपल्या संमतीशिवाय अतिक्रमण करून खोदकाम झाले असून त्यामधील ३७,५०० ब्रास खोदकाम झाले आहे. झालेल्या खोदकामाची एकूण रॉयल्टी २ कोटी रुपये मिसाळ यांना भरावी लागणार असल्याची माहिती महसूल अधिकाऱ्यांनी दिली.
त्यानंतर सुभाष मिसाळ हे दिनेश जाधव यांना विचारणा करण्यासाठी गलांडवाडी नं.१ येथील घरी गेले असता त्या ठिकाणी उपस्थित असलेले बाळासाहेब जाधव यांनी कोणालातरी फोन केला. त्यानंतर त्या ठिकाणी दीपक बाळासाहेब जाधव व दिनेश बाळासाहेब जाधव आले. त्यापैकी एकाने 13 ते 14 लाख रुपये आपण दिले असून ही जमीन आपल्या मालकीची झाली आहे, असे सांगितले.
अद्याप आम्ही तुमच्या नावावर खरेदी खत करून दिलेले नाही. व आम्ही दिलेल्या ६० आर क्षेत्रापैकी ६५ आर क्षेत्रात अतिक्रमण करून फसवणूक केली व त्या ठिकाणी खोदकाम केली, असे म्हणताच उपस्थित असलेल्या आरोपींनी फिर्यादी सुभाष अर्जुन मिसाळ यांना जातीवाचक शिवीगाळ करत जीवे मारण्याची धमकी दिल्याने दीपक बाळासाहेब जाधव ,दिनेश बाळासाहेब जाधव व बाळासाहेब जाधव यांच्या विरोधात अनुसूचित जाती जमाती अत्याचार संरक्षण कायद्यानुसार गुन्हा दाखल करण्यात आला आहे. इंदापूर तालुक्यातील वजनदार नेते म्हणून ओळखले जाणारे दीपक जाधव यांच्यावर गुन्हा दाखल करण्यात आल्यामुळे राष्ट्रवादी काँग्रेस पक्षाच्या गोटात खळबळ उडाली आहे.
