बारामती : राष्ट्रवादीचे आमदार रोहित पवार यांच्या अनंत आरोग्य अभियान व बारामतीतील रा.तु. भोईटे प्रतिष्ठानच्या माध्यमातून बारामतीत सुरू असलेल्या हृदयरोग शिबीरात 12 डिसेंबरपासून आजपर्यंत 307 रुग्णांची मोफत अॅंजिओग्राफी, 29 बायपास सर्जरी व तब्बल 109 रुग्णांवर मोफत अॅंजिओप्लास्टी शस्त्रक्रिया यशस्वी झाल्या. या शिबीरामुळे सामान्य रुग्णांचा सुमारे 2 ते 2.50 कोटींचा खर्च वाचला.
मागील काही वर्षांपासून रोहित पवार हे राष्ट्रवादीचे अध्यक्ष शरद पवार यांच्या वाढदिवसाचे औचित्य साधून अनंत आरोग्य अभियान राबवित आहेत. बारामतीतील कै. रा. तु. भोईटे प्रतिष्ठानच्या संयुक्त विद्यमाने बारामतीत या अभियानातून 4 वर्षात 1161 एवढ्या अॅंजिओग्राफी व 498 अॅंजिओप्लास्टी व 52 बायपास सर्जरी झाल्या. या शिबीरात राज्यभरातील रुग्णांनी सहभाग घेतला.
रोहित पवार यांनी बारामती तालुक्यातील शिर्सूफळ जिल्हा परीषद गटाचे सदस्य झाल्यानंतर ही हृदयरोग शिबीराची संकल्पना मांडली, त्यास प्रतिसाद देत हृदयरोगतज्ज्ञ डॉ. रमेश भोईटे यांनी या शस्त्रक्रिया विविध योजनांचे साह्य घेऊन व लाभार्थ्यांचीही आर्थिक स्थिती लक्षात घेऊन मोफत करण्याची तयारी दाखविली. यामध्ये अॅंजिओग्राफीसाठी येणारा खर्चही भरण्यासाठी रुग्णांची ऐपत नसल्याने शासकीय योजनांचाही लाभ घेणे अनेकदा मुश्कील होते हे लक्षात आल्याने पवार यांनी त्यासाठीचा खर्च उचलण्याची तयारी दाखवली. त्यातून सन 2016 पासून ही शिबीरे आयोजित केली जात आहेत. आजवर या शिबीरांमधून रुग्णांचे दरवर्षी 2 ते 2.50 कोटी रुपयांचा खर्च वाचण्यास मदत झाली.तर 4 वर्षात 8.25 कोटी रुपयांचा रुग्णांचा खर्च वाचला.
माझे वडील जगन्नाथ म्हेत्रे यांना एका वर्षापासून हृदयरोगाचा त्रास होता. बारामतीच्या शिबीराबाबत माहिती मिळाल्यानंतर तेथे दाखल केले. शस्त्रक्रिया पार पडली. चांगली सुविधा मिळाली. या शिबीरामुळे माझे वडील पुन्हा पूर्ववत शेतीतील काम करीत आहेत. : विजय म्हेत्रे, कर्जत. जि. नगर
पवारसाहेबांनी आजवरच्या राजकीय कारकीर्दीत सामान्य व्यक्ती केंद्रबिंदू मानून त्यांच्या हिताचे निर्णय घेतले. त्यांच्या वाढदिवसाच्या निमित्ताने शिबीरांच्या माध्यमातून सामान्य कुटुंबावर आलेले आजाराचे संकट कमी करण्याचा प्रयत्न होतोय हे महत्वाचे आहे. : आमदार रोहित पवार
