चला रायगड प्रदक्षिणेला ! २६ डिसेंबरला !

महाड : महान्यूज लाईव्ह

रायगड किल्ला म्हटला की डोळ्यासमोर येतो तो शिवरायांचा अतुलनीय पराक्रम, सह्याद्रीचा रांगडेपणा आणि दऱ्याखोऱ्या मध्ये घनदाट जंगलात लपलेली वनसंपदा. महाराष्ट्राची अस्मिता असणा-या अशा या रायगडाला प्रदक्षिणा म्हणजे साक्षात मंदिरालाच प्रदक्षिण. या किल्ल्याला अशी प्रदक्षिणा घालण्याची इच्छा अनेकांना मनात दडलेली असते.अशा या साहस वीरांसाठी आणि रायगड प्रेमींसाठी रायगड प्रदक्षिणेची संधी चालून आली आहे . यावर्षी महाड युथ क्लब व रायगड जिल्हा परिषदेच्या सहकार्याने 26 डिसेंबरला राज्यस्तरीय रायगड प्रदक्षिणा आयोजित केली आहे. तर चला या प्रदक्षिणेला.

हिंदवी स्वराज्याची राजधानी असलेल्या रायगड किल्ल्यावर अनेकजण जात असतात. परंतु रायगडाचा खरा इतिहास आणि परिसर समजून घ्यायचा असेल तर रायगड प्रदक्षिणा प्रत्येकाने करायलाच हवी. रायगड किल्ल्याच्या 15 किलोमीटरचा परिसर व चार तासाच्या दमछाक होणा-या खडतर प्रवासात ही प्रदक्षिणा पूर्ण होते. साहस वीरांना आव्हान देणारी आणि आपल्या शारीरिक शक्तीचे मूल्यांकन करणारी अशीही प्रदक्षिणा असते. प्रदक्षिणेच्या वाटेवर पक्षांची मंजुळ गुंजारव. सरपटणाऱ्या प्राण्यांची घाबरवणारी चाहूल, हिरव्यागार वनस्पतींचा स्पर्श, शुद्ध हवा, व वृक्षांची थंडगार सावली तर कधी अंगातून वाहणार्‍या घामाच्या धारा, चिंचोळ्या पाऊल वाटेवरील उंच चढण तर कधी तीव्र उतारावर सरकत जाणारे पाय असे विविध पडाव या प्रदक्षिणेत पार करावे लागतात. अनुभवांची मोठी शिदोरी या प्रदक्षिणमध्ये जमा होत असते.रायगड युथ क्लब तीस वर्षापासून हा उपक्रम यशस्वीपणे राबवत आहे. दरवर्षी आठशे ते हजार प्रदक्षिणार्थी यामध्ये सहभागी होतात.

कशी असेल प्रदक्षिणा

रायगड प्रदक्षिणेला 26 डिसेंबरला सकाळी 6 वाजता पायथ्यापासून सुरूवात होणार आहे. या प्रदक्षिणेत 10 वर्षावरील कोणतीही सुदृढ व्यक्ती सहभागी होऊ शकते. 15 किलोमीटरची ही प्रदक्षिणा पूर्ण करायला प्रत्येकाच्या क्षमतेप्रमाणे किमान 4 तासाचा अवधी लागतो. प्रदक्षिणा पूर्ण करणा-यांना युथ क्लबतर्फे प्रशस्तीपत्रक दिले जाणार आहे. सहभागी होणा-यांना मुक्कामाची सोय विनामुल्य केली जाते. तसेच प्रदक्षिणेच्या दिवशी चहा नाश्ता, पॅक फुड व जेवण आयोजकांमार्फत दिले जाते.

प्रदक्षिणेला येताना काय करावे

प्रदक्षिणेत सहभागी होणा-यांनी आपल्या सोबत पाण्याची बाटली, लंच बॉक्स, टोपी, सुती कपडे, अंथरूण व पांघरूण, लागणारी औषधे सोबत आणावीत.

कसे पोहोचाल

रायगडला जाण्यासाठी मुंबई गोवा महामार्गावरील महाड येथून 25 किलोमीटरचा प्रवास करावा लागतो. मुंबई पुणे येथून थेट बससेवा आहेत. तसेच कोकण रेल्वेमार्गावर वीर किंवा माणगाव स्थानकावर उतरून रायगडला जाता येते.

आपल्यालाही रायगडची प्रदक्षिणा करायची असेल तर नाव नोंदणीसाठी दिलिप धारप, संतोष सकपाळ 9422689180, राजेश बुटाला 8805848396 येथे संपर्क साधावा. आपण यासाठी http://www.youthclubmshad.org
येथे ऑनलाईन बुकिंग करू शकता