संगमनेर : महान्यूज लाईव्ह
मंत्रोच्चाराच्या सुरात दुर्धर आजार पळवून लावण्याचा दावा करणारा आणि स्वतःला ‘दत्तधाम सरकार’ म्हणवून घेणाऱ्या राजेंद्र गडगे याच्या भोंदूगिरीचा बाजार अखेर गुंडाळला गेला आहे. संगमनेर तालुक्यातील वडगावपान येथे श्रद्धेच्या नावाखाली निष्पाप लोकांची फसवणूक करणाऱ्या या भोंदू बाबाला पोलिसांनी बेड्या ठोकल्या असून, त्याच्या काळ्या कारभाराचा पर्दाफाश केला आहे.
गेल्या १० वर्षांपासून राजेंद्र बापू गडगे याने या परिसरात स्वतःला दैवी शक्ती प्राप्त असल्याचे भासवून लोकांमध्ये दहशत आणि श्रद्धा यांचे एक अजब जाळे विणले होते. केवळ दरबारापुरते मर्यादित न राहता, त्याने सोशल मीडियाचा वापर करत ‘दत्तधाम सरकार’ नावाचे युट्यूब चॅनल सुरू केले. या माध्यमातून तो कॅन्सरसारखे गंभीर आजार मंत्रशक्तीने बरे करण्याचे आणि वंध्यत्वावर उपाय करण्याचे खोटे दावे करत असे. संकटात सापडलेला सामान्य माणूस या आमिषाला बळी पडत होता आणि तिथेच त्याच्या लुटीला सुरुवात होत होती.
तपासातून समोर आलेली माहिती अंगावर काटा आणणारी आहे. संकटांचे निवारण करण्यासाठी हा भोंदू भक्तांकडून १५ हजारांपासून ५१ हजार रुपयांपर्यंतची रक्कम उकळत असे. इतकेच नाही, तर उपचाराच्या नावाखाली जंगलातील पालापाचोळा औषध म्हणून देऊन तो रुग्णांच्या आयुष्याशी खेळत होता. गेल्या दशकभरात शेकडो लोकांचे आर्थिक, शारीरिक आणि मानसिक शोषण केल्याचा प्राथमिक ठपका त्याच्यावर ठेवण्यात आला आहे.
अंधश्रद्धा निर्मूलन समितीच्या राज्य सचिव ॲड. रंजना गवांदे यांनी या अन्यायाविरुद्ध आवाज उठवत पोलिसांत फिर्याद दिली. या तक्रारीची दखल घेत संगमनेर तालुका पोलिसांनी तातडीने सूत्रे हलवली आणि रात्रीच्या सुमारास मोठी कारवाई करत राजेंद्र गडगेसह मधुकर शिंदे याला अटक केली. या प्रकरणात गडगेची मुलगी ज्ञानेश्वरी, डॉ. मोहन पुरी आणि सुरज शिंदे अशा एकूण पाच जणांविरुद्ध गुन्हा दाखल करण्यात आला असून फरार आरोपींचा शोध सुरू आहे.
बनावट व्हिडिओ तयार करून लोकांची दिशाभूल करणे आणि वैद्यकीय पदवी नसताना उपचार करणे, अशा अनेक गंभीर बाबी पोलिसांनी निदर्शनास आणल्या आहेत. त्यामुळेच आरोपींवर जादूटोणा विरोधी कायद्यासह आयटी ॲक्ट आणि मेडिकल प्रॅक्टिशनर ॲक्टमधील कडक कलमान्वये गुन्हा नोंदवण्यात आला आहे. पोलीस निरीक्षक प्रवीण साळुंखे यांच्या मार्गदर्शनाखाली या रॅकेटचे धागेदोरे शोधण्याचे काम सध्या युद्धपातळीवर सुरू आहे.
