फोरमच्या अध्यक्षा सुनेत्रा पवार यांच्या हस्ते मास्क प्रदान
बारामती : महान्यूज लाईव्ह
बारामती येथील पंचायत समिती व बारामती नगरपरिषदेतील कर्मचाऱ्यांसाठी एन्व्हॉर्यमेंटल फोरम ऑफ इंडिया व फेरेरो इंडिया लिमिटेड कंपनीच्या वतीने मास्कचे वाटप केले गेले. फोरमच्या अध्यक्षा सुनेत्रा पवार यांच्या हस्ते नगरपालिकेचे मुख्याधिकारी किरणराज यादव व गटविकास अधिकारी राहुल काळभोर यांच्याकडे हे मास्क सुपूर्द करण्यात आले.
कोरोनाच्या काळात एन्व्हॉर्यमेंटल फोरमच्या वतीने मार्च महिन्यापासून आजतागायत बारामती नगरपालिकेच्या सफाई कर्मचारी, उद्यान विभागातील कर्मचाऱ्यांना हजारो मास्कचे वाटप केलेले आहे. कोरोनाच्या काळात बारामती नगरपालिका तसेच पंचायत समितीच्या विविध विभागाच्या कर्मचाऱ्यांनी केलेले काम मोठे आहे. या यंत्रणेला सहकार्य करण्याच्या उद्देशाने हे मास्कवाटप केल्याचे सुनेत्रा पवार यांनी या वेळी सांगितले.
दरम्यान किरणराज यादव व राहुल काळभोर यांनी फेरेरो व फोरमच्या वतीने मास्क प्रदान केल्याबद्दल आभार व्यक्त केले.
