राज्यातील सहकारातील पहिले प्रकरण..
बारामती : महान्यूज लाईव्ह
सहकाराची पंढरी म्हणणाऱ्या बारामतीत न्यायालयाला दखल घ्यावी लागली आणि न्यायालयाने कृषी उत्पन्न बाजार समितीचे संचालका विरोधात थकबाकीदार असतानाही सहकारी संस्थेची निवडणूक लढवली व खोटे प्रतिज्ञापत्र दाखल केले या कारणावरून बारामतीच्या न्यायालयाने विनायक महादेव गावडे यांच्या विरोधात गुन्हा दाखल करण्याचे आदेश दिले.
त्यानुसार बारामती शहर पोलीस ठाण्यात विनायक गावडे यांच्याविरोधात गुन्हा दाखल करण्यात आला आहे. दुसरीकडे बारामती सहकारी बँकेने गावडे यांना दिलेले प्रतिज्ञापत्र खोटे आहे की खरे? यावरूनही प्रश्नचिन्ह निर्माण झाले असून, थकबाकीदार असताना बँकेने थकबाकी नसल्याचा दाखला कसा दिला? यावरूनही नव्याने प्रश्नचिन्ह निर्माण झाले आहे.
याची थोडक्यात माहिती अशी, विनायक गावडे हे कृषी उत्पन्न बाजार समितीचे संचालक आहेत. त्यांनी निवडणूक लढवण्यापूर्वीच बारामती सहकारी बँकेकडून 30 लाख रुपयांचे कर्ज घेतले होते. 1 मार्च 2021 पासून ते बँकेचे थकबाकीदार असल्याचा आक्षेप गुणवडी तालुका बारामती येथील श्री दत्त विविध कार्यकारी सहकारी सोसायटीच्या सभासदांनी घेतला होता.
या सोसायटीची निवडणूक जाहीर करण्यात आली होती आणि यामध्ये गावडे यांनी उमेदवारी अर्ज दाखल केला होता. त्यावेळी कृष्णाजी उर्फ कालिदास आनंदराव गावडे यांनी त्यास आक्षेप घेतला. सहकारी संस्थेच्या महाराष्ट्र राज्य सहकारी अधिनियम 1960 च्या कलम 73 क नुसार कोणत्याही सहकारी संस्थेमध्ये थकबाकीदार नसलेल्या सदस्यालाच सहकारी सोसायटीची निवडणूक लढवता येते, हा कायदा असूनही थकबाकीदार असताना विनायक गावडे निवडणूक लढवत होते, म्हणून कालिदास गावडे यांनी आक्षेप घेतला होता.
मात्र यावेळी विनायक गावडे यांनी बारामती सहकारी बँकेचा एक लेटरपॅड असलेला दाखला निवडणूक निर्णय अधिकाऱ्यांना दाखवला. यामध्ये बँकेच्या व्यवस्थापकाची स्वाक्षरी व बँकेचा शिक्का होता व त्यावरती विनायक गावडे यांच्याकडे थकबाकी नसल्याचा दाखला देण्यात आला होता.
या पत्रामुळे त्यांचा आक्षेप रद्द झाला आणि त्यांनी निवडणूक लढवली व त्यानंतर त्यांनी बारामती कृषी उत्पन्न बाजार समितीची देखील निवडणूक लढवली. यामध्ये बारामती कृषी उत्पन्न बाजार समितीचे संचालक म्हणून ते निवडून आले. या सोसायटीत निवडून आले.
मात्र त्यानंतर बारामती येथील सहाय्यक निबंधकांनी विनायक महादेव गावडे यांच्यावर 27 सप्टेंबर 2022 रोजी कलम 101 अंतर्गत बारामती सहकारी बँकेच्या कर्जासंदर्भात अंतर्गत वसुलीची कारवाई केली त्यानंतर 17 नोव्हेंबर 2022 रोजी कलम 156 अंतर्गत जप्तीची देखील कारवाई करण्यात आली. त्यामुळे त्यांनी दिलेले प्रतिज्ञापत्र हे खोटे असल्याचा दावा कृष्णाजी उर्फ कालिदास आनंदराव गावडे यांनी केला.
त्यावरून कृष्णाजी उर्फ कालिदास गावडे यांनी बारामतीत न्यायालयाचे दरवाजे ठोठावले. अॅड. अमर काळे यांच्या वतीने यामध्ये युक्तिवाद करण्यात आला. न्यायालयात मांडलेल्या कागदपत्रानुसार प्रथमदर्शनी हा गुन्हा दाखलपात्र व गंभीर स्वरूपाचा असल्याचे मत नोंदवत न्यायाधीश श्रीमती डी. पी. पुजारी यांनी विनायक गावडे यांच्याविरोधात गुन्हा दाखल करण्याचे आदेश बारामती पोलिसांना दिले. त्यानुसार बारामती पोलिसांनी विनायक गावडे यांच्याविरोधात गुन्हा दाखल केला आहे.
त्यामुळे बारामती शहर पोलीस ठाण्यात कृष्णाजी उर्फ कालिदास आनंदराव गावडे यांच्या फिर्यादीवरून विनायक महादेव गावडे यांच्या विरोधात गुन्हा दाखल करण्यात आला आहे. श्रीदत्त विविध कार्यकारी सहकारी सेवा संस्था गुणवडी यामध्ये सभासद असलेल्या कृष्णाजी उर्फ कालिदास आनंदराव गावडे यांनी तक्रार केली असून त्या फिर्यादीवरून पोलिसांनी गुन्हा दाखल केला आहे. पुढील तपास बारामती शहर पोलीस करत आहेत.
