जीवन सोनवणे : महान्यूज लाईव्ह
भोर : घराशेजारी अंगणात खेळताना सर्पदंश झाल्याने खानापूर ता.भोर येथील अंगणवाडीत शिकणारा चिमुकला रघुनाथ मारुती भालेराव (वय -५) याचा उपचारादरम्यान बुधवार दि.९ मृत्यू झाल्याची घटना घडली.
भोर तालुक्यात पावसाच्या विश्रांतीने सध्या वातावरणात उकाडा फार वाढला आहे. परिणामी गारव्यासाठी घरांशेजारील गवत-वेलींचा आधार साप घेत आहेत. असे लपून बसलेले साप लहान मुले तसेच नागरिकांना चावा घेण्याचे प्रकार तालुक्यात वाढले आहेत.
खानापूर येथील रघुनाथ भालेराव हा चिमुकला खानापूर घराशेजारील अंगणात मोठ्या बहिणीबरोबर खेळत होता. यावेळी अचानक गवतात लपून बसलेल्या सर्पाने दंश केला. मात्र रघुनाथ हा वयाने लहान व नकळत असल्याने त्याला सर्पदंश झाल्याचे समजून आले नाही. रात्री उशिरा त्याला त्रास होऊ लागल्याने भोर येथील खाजगी रुग्णालयात दाखल करण्यात आले.
यावेळी रघुनाथ याला सर्पदंश झाल्याचे निष्पन्न झाले. तात्काळ या चिमुकल्याला पुणे येथे उपचारासाठी पाठवण्यात आले मात्र उपचार सुरू असतानाच त्याचा मृत्यू झाला. रघुनाथ भालेराव या चिमुकल्याचा सर्पदंशाने मृत्यू झाल्याने खानापूर परिसरात हळहळ व्यक्त करण्यात येत आहे.
