बारामती : महान्यूज लाईव्ह
कोरोना सर्व क्षेत्रासाठी आपत्ती ठरली, मात्र मंदीत संधी शोधणाऱ्यांसाठी कोणतीही आपत्ती इष्टापत्ती ठरते, बारामतीकरांसाठी ती इष्टापत्ती ठरली.. ऑगस्ट महिन्यात जिथे बारामतीत कोरोनाचे रुग्ण वाढत होते, त्याच काळात बारामती तालुक्यातील व्यवसायास मुंबईकरांनी हातभार लावला! तो कितीचा असेल?..तर तो होता, एक कोटींचा..!
मुंबईच्या प्रॉडक्शन कंपनीने बारामती तालुक्यात एक वेबसिरीज शूट केली, त्यातून हॉटेल, केटरिंग, हेल्पर, ज्युनिअर आर्टीस्ट, स्थळभाडे असे मिळून बारामतीकरांना १ कोटींचा जॅकपॉट लागला…!
बारामती तालुक्यातील ढाकाळे गावासह बारामती शहरातील प्राईम लोकेशनवरती एसओटी ( सर्जिकल स्ट्राईक टिम) या वेबसिरीजचे शुटींग ७ ऑगस्ट ते १७ ऑगस्ट दरम्यान झाले. या शुटींगसाठी मुंबईतून ५० जणांची टिम आली होती. या पथकाची अगोदर कोरोना चाचणी करण्यात आली. त्यानंतरच त्यांना बारामतीतील मुक्कामाची परवानगी देण्यात आली होती.
बारामती तालुक्यातील ज्युनिअर आर्टिस्ट, हेल्पर, कर्मचारी, सुरक्षारक्षक अशा जवळपास ४०० जणांचा यामध्ये सहभाग राहीला. या साऱ्यांना चांगल्या मानधनामुळे कोरोनाच्या काळात व्यवसाय बंद असताना चांगले पैसे मिळाले. येथील हॉटेल व्यावसायिक, केटरींग व्यावसायिकांबरोबरच गेली सहा महिने वाहनांना भाडे मिळाले नव्हते, अशा अनेक वाहनांनाही भाडे मिळाले.
या वेबसिरीजचे बारामतीत शुटींग व्हावे यासाठी राहूल जगताप ढाकाळकर यांनी धडपड केली. सोनी लीव या वाहिनीवर ही वेबसिरीज चालणार आहे. भारत-पाकिस्तानमधील सर्जिकल स्ट्राईकवर आधारीत ही वेबसिरीज आहे. क्लिक फ्लिक या पाचगणीच्या कंपनीने जगताप यांच्याशी संपर्क साधला होता. त्यांनी त्यांना अपेक्षित असलेली लोकेशन्स विचारली होती.
जगताप यांनी दोन महिने सोशल मिडीयावर, मित्रांना याबाबत आवाहन केले होते. मुंबईतील कंपनीलाही ही लोकेशन्स आवडली. यानंतर उपमुख्यमंत्री अजितदादा पवार यांना या संदर्भातील माहिती दिल्यानंतर त्यांनी बारामतीकरांना त्यातून काय मिळेल याची विचारणा केली व स्थानिकांना मिळणाऱ्या लाभानंतर त्यांनी याची परवानगी दिली. प्रशासनानेही यासाठी सहकार्य केले.
मुंबईतील बड्या अभिनेत्याची ही प्रॉडक्शन कंपनी असून या कंपनीची ही निर्मिती आहे. लवकरच ही वेबसिरीज छोट्या पडद्यावर दिसणार आहे.
जवळपास १५ दिवसांत पेट्रोलपंपापासून ते हॉटेल पर्यंत व पुष्पहाराच्या दुकानदारांपासून ते छोट्या छोट्या व्यावसायिकांपर्यंत या सिरीजचा अनेकांना व्यवसाय वृध्दीसाठी लाभ मिळाला. या दरम्यान उद्योजक रणजित पवार, आमदार रोहित पवार, सोनाई कंपनी चे संचालक अतुल माने यांचेही या वेबसिरीजमधील कलाकारांना सहकार्य मिळाले.
कोरोनाच्या काळात अनेक व्यवसाय अभूतपूर्व मंदीचा सामना करीत आहेत, अशा काळात बारामती तालुक्यात १ कोटी रुपये आले, अर्थात बारामती तालुक्यातील लोकेशन्स, केव्हीके, बारामती शहर, तालुक्यातील अनेक गावे, नदींचे संगम अशा विविध ठिकाणांना मुंबईतील शुटींगसाठी स्थळे शोधून देणाऱ्या मध्यस्थ कंपन्यांचीही पसंती मिळाली असून यापुढील काळात बारामतीत अशा प्रकारची अल्पकालीन, दिर्घकालीन चित्रीकरण होऊ शकते असे मत राहूल जगताप ढाकाळकर यांनी व्यक्त केले.
