दौलतराव पिसाळ : महान्यूज लाईव्ह
वाई : वाई वीज वितरण कंपनीच्या हाय वोल्टेजच्या झटक्याने पसरणी ग्रामस्थांना लाखो रुपयाचा फटका बसला. यामुळे अनेकजण हवालदिल झाले आहेत. या नुकसानीची विजवितरण कंपनीने नुकसान भरपाई द्यावी अशी मागणी ग्रामस्थ करीत आहेत.
आज दुपारच्या सुमारास पसरणी ता. वाई येथे वीज पुरवठा करणाऱ्या एका विदयुत जनित्रात बिघाड झाल्याने सुमारे 100 घरांमध्ये उच्च दाबाने वीज पुरवठा झाला. यामुळे या घरातील विद्युत उपकरणे शॉर्टसर्किट होऊन जळाली. दुपारचा सुमार असल्याने अनेक जण वामकुक्षी घेत होते. पंखे, कूलर, फ्रीझ, कॉम्पुटर, टी. व्ही. सेट, दुकानातील इलेक्ट्रॉनिक वजन काटे यामध्ये शॉर्टसर्किट झाले. यामुळे ही उपकरणे निकामी झाली.
अनेकांचे महागातील एलइडी टी. व्ही. संच यात खराब झाले. कित्येकांनी ही उपकारणे नुकतीच खरेदी केली होती. काहींनी ती हप्त्याने घेतले होते. या नुकसानीमुळे अनेकजण हवालदिल झाले आहेत. याची नुकसान भरपाई विजवितरण कंपनीने द्यावी अशी मागणी नुकसानग्रस्त करीत आहेत.
स्वतःच्या शेतात काम करताना शेतातील लाईटच्या खांबाचे नुकसान झाल्यास सदर नुकसानीची भरपाई संबंधित शेतकऱ्याकडून वीज वितरण कंपनी घेते. असे असताना वीज वितरण कंपनीच्या चुकीमुळे आमचे झालेले नुकसानीची भरपाईही वीज वितरण कंपनीने द्यावी, अशी मागणी ग्रामस्थ करीत आहेत.
याबाबत आरपीआयचे युवक उपाध्यक्ष स्वप्निल गायकवाड व पसरणी ग्रामस्थांनी वीज वितरण कंपनीच्या अधिकाऱ्यांची भेट घेऊन नुकसानीची भरपाई मिळण्याबाबत मागणी केली. त्यानुसार अधिकाऱ्यांनी तातडीने नुकसान झालेल्या घरांतील उपकरणांची पाहणी करून पंचनामे करण्यास सांगितले आहेत.
