शिरूर : महान्यूज लाईव्ह
नारायणगाव (ता. जुन्नर) हददीतील खोडदरोड येथील झालेल्या खूनाचा गुन्हा अखेर उघडकीस आला असून या प्रकरणी आरोपींना स्थानिक गुन्हे शाखा व नारायणगाव पोलिसांनी अटक केली आहे.
याबाबत सविस्तर असे की, नारायणगाव हद्दीत पडिक जमिनीमध्ये एका अनोळखी व्यक्तीचा खून झाला होता. याबाबत नारायणगाव पोलीस स्टेशन येथे अज्ञात आरोपींविरोधात गुन्हा दाखल करण्यात आला.
सदरचा गुन्हा हा गंभीर स्वरूपाचा असल्याने मयताची ओळख पटवून सदर आरोपींना लवकरात लवकर अटक करण्याच्या सुचना पोलीस अधीक्षक अंकित गोयल यांनी नारायणगाव पोलीस स्टेशन तसेच स्थानिक गुन्हे शाखेला दिल्या होत्या. त्यानुसार स्थानिक गुन्हे शाखा व नारायणगाव पोलिस तपास करत होते.
सदर खुनाच्या गुन्ह्यातील मययाची ओळख पटविण्याचा प्रयत्न सुरू केला. रात्री उशीरा सदर मयताचा फोटो पाहून मयताचे नातेवाईक यांनी मयताची ओळख पटविली. सदर मयताचे नाव साहेबराव नामदेव भुतांबरे (वय ४५ वर्षे रा. कोतूळ ता. अकोले जि.अहमदनगर सध्या रा. पाटखैरेमळा नारायणगाव ता. जुन्नर जि.पुणे) असे असल्याचे निष्पन्न झाले.
या व्यक्तीची ओळख पटल्यानंतर त्याची नारायणगाव परिसरामध्ये गोपनीय बातमीदारामार्फत त्याच्याबद्दल माहिती घेतली असता तो जेसीबी ड्रायव्हर असल्याचे समजले तसेच घटनेच्या रात्री त्याला दोन व्यक्तींसोबत खोडद रोड च्या दिशेने जाताना पाहिले होते. त्यामुळे सदरच्या गुन्हयात त्याच्यासोबतच्या त्या दोन व्यक्तींचा सहभाग असल्याचा संशय आल्याने लागलीच त्यांचा शोध नारायणगाव परिसरामध्ये सुरू केला.
त्यानंतर मयत साहेबराव नामदेव भुतांबरे याचेसोबत असणारे प्रियाल उर्फ बंटी गंगाराम खरमाळे (वय ३१ वर्षे रा. अमरवाडी खोडद ता. जुन्नर जि. पुणे), देवराम विठठल कोकाटे (वय २७ वर्षे रा. कुंभारआळी खोडद ता. जुन्नर जि. पुणे) यांना पोलिसांनी ताब्यात घेतले. सदर गुन्हयाबाबत त्यांचेकडे चौकशी सुरू केली. चौकशी करत असताना सुरूवातीला त्यांनी उडवाउडवीची उत्तरे दिली. त्यानंतर त्यांचेकडे अधिक कसून चौकशी केली असता त्यांनी सदरचा गुन्हा हा अनैतिक संबंधातून घडलेल्या आर्थिक व्यवहाराच्या वादातून केल्याचे निषन्न झाले.
सदर गुन्हयाचा पुढील अधिकचा तपास नारायणगाव पोलीस स्टेशनचे पोलीस उपनिरीक्षक विनोद धुर्वे हे करत आहेत. हा तपास उपविभागीय पोलिस अधिकारी रविंद्र चौधर, स्थानिक गुन्हे शाखेचे पोलीस निरीक्षक अविनाश शिळीमकर यांचे मार्गदर्शनाखाली नारायणगाव पोलीस स्टेशनचे प्रभारी अधिकारी पृथ्वीराज ताटे, फौजदार धुर्वे, फौजदार धनवे, स्थानिक गुन्हे शाखेचे फौजदार अभिजित सावंत, हवालदार दिपक साबळे, विक्रम तापकिर, राजू मोमीण, पोलिस नाईक संदिप वारे, अक्षय नवले, निलेश सुपेकर तसेच नारायणगाव पोलीस स्टेशनचे हवालदार कोकणे, मंगेश लोखंडे, शैलेश वाघमारे, गोरक्ष हासे, संतोष साळुंके, योगेश गारगोटे, गोकुळ कोळी, गोविंद केंद्रे, अरविंद वैद्य यांनी केली.
