शिरूर : महान्यूज लाईव्ह
पुणे ग्रामीण पोलीस दलातील स्थानिक गुन्हे शाखेत कार्यरत असलेले लोणी काळभोर (ता. हवेली) येथील पोलीस उपनिरीक्षक शिवाजी ननवरे यांनी ८ हजार ८४८ मीटर उंची असलेले जगातील सर्वोच्च पर्वत शिखर माऊण्ट एव्हरेस्टला गवसणी घातली आहे. माउंट एव्हरेस्ट शिखर हे चढाईस अत्यंत कठीण असे पर्वतशिखर आहे. पण हार मानेल तो माणूस कसला, आपल्या दुर्दम्य इच्छाशक्तीच्या सहाय्याने शिवाजी ननवरे यांनी माऊंट एवरेस्ट शिखरावर तिरंगा झेंडा रोवला.
पोलिस उपनिरीक्षक शिवाजी ननवरे हे मूळचे सोलापूर जिल्ह्यातील करमाळा तालुक्यातील आहेत.पुणे ग्रामीण दलात स्थानिक गुन्हे शाखेत ते पोलीस उपनिरीक्षक या पदावर सध्या कार्यरत आहेत. ननवरे यांना गिर्यारोहणाची आवड असल्याने त्यांनी या मोहिमेसाठी मोठी तयारी केली होती. गुरुवारी (दि.१८) रोजी माऊंट एवरेस्ट शिखर सर करून त्यांनी ही मोहीम यशस्वी केली आहे.
त्यांच्या या पराक्रमामुळे पुणे ग्रामिण पोलीस दलाच्या शिरपेचात अजून एक मानाचा तुरा रोवला गेला आहे. माउंट एव्हरेस्ट शिखर सर करण्यासाठी महाराष्ट्राची रणरागिणी सुविधा राजेंद्र कडलग यांनी एव्हरेस्ट मोहीम आखली होती. या मोहिमेमध्ये महाराष्ट्र पोलीस दलाच्या वतीने पुणे ग्रामीण पोलीस दलातील स्थानिक गुन्हे शाखेत कार्यरत पोलीस उपनिरीक्षक शिवाजी ननवरे यांची निवड करण्यात आली होती.
याबाबत बोलताना पोलीस उपनिरीक्षक शिवाजी ननवरे यांनी सांगितले की, ‘गडचिरोली जिल्ह्यात कर्तव्य करत असताना गिर्यारोहणाची आवड निर्माण झाली. ती आवड कर्तव्य बजावीत असताना व्यस्त वेळापत्रकातून कायम ठेवली आहे. माऊंट एव्हरेस्ट सर करण्यासाठी शारीरिक क्षमतेबरोबर मानसिक क्षमता असणे अत्यावश्यक आहे. उंच ठिकाणामुळे हवेतील तसेच शरीरातील ऑक्सिजन कमी होतो. त्यामुळे नॉर्मल चालताना देखील दमछाक होते. परंतु, जिद्द आणि आत्मविश्वासाच्या जोरावर ही मोहीम यशस्वी करण्यात आली आहे.
