कसला मातृत्व दिन? निरेमध्ये डॉक्टरने आणि आईनेच घेतला पोटातल्या मुलीचा जीव! 

निरा : महान्यूज लाईव्ह 

आज सर्वत्र आईची थोरवी गायली जात असताना, सगळ्या सोशल मीडियावर आपापल्या आयांचे फोटो मिरवले जात असताना, दुसरीकडे एका डॉक्टरने व आईनेच पोटातल्या मुलीचा जीव घेतल्याची घटना विद्येच्या माहेरघर असलेल्या पुणे जिल्ह्यात घडली आहे.

 पुरंदर तालुक्यातील नीरा गावातील श्रीराम हॉस्पिटलमध्ये हा बेकादेशीर गर्भपात झाला असून याप्रकरणी दवाखान्याचा डॉक्टर एजंट आणि संबंधित गर्भवती महिला या तिघा विरोधात जेजुरी पोलिसांनी गुन्हा दाखल केला आहे. 

  जिल्हा शल्यचिकित्सक डॉ नागनाथ संग्रामआप्पा यम्पल्ले यांनी डॉ. सचिन रामचंद्र रणवरे याच्यासह जिचा गर्भपात झाला ती महिला व बरकडे नावाचा एजंट अशा तिघांविरोधात फिर्याद दिली होती, त्यानुसार जेजुरी पोलिसांनी स्त्रीभ्रूणहत्येचा हा गुन्हा दाखल केला आहे.

यासंदर्भात जेजुरी पोलिसांनी दिलेली माहिती अशी की,  जिल्हा शलचिकित्सक डॉ. नागनाथ संग्रामआप्पा यम्पल्ले यांनी जेजुरी पोलिसांकडे दिलेल्या फिर्यादीनुसार जिल्हा शल्यचिकित्सक कार्यालयाला १२ मे रोजी राज्याच्या कुटुंब कल्याण कार्यालयाकडून गोपनीय ईमेल आला होता.

  त्यामध्ये पुरंदर तालुक्यातील पिसुर्टी या गावामध्ये बरकडे नावाचा एजंट असून तो निरा गावातील डॉक्टर सचिन रणवरे यांच्या श्रीराम हॉस्पिटलमध्ये बेकायदेशीर रित्या गर्भपात करत असल्याची माहिती दिली होती.

  14 मे रोजी डॉ. सचिन रणवरे हा डॉक्टर गर्भवती महिलेचा गर्भपात करणार असल्याची माहिती देखील या ईमेलवर आली होती. या महिलेस पहिली मुलगी असून बरकडे याने बेकायदेशीररित्या गर्भलिंग निदान केल्यानंतर नीरा येथील बारामती रस्त्यावरील श्रीराम हॉस्पिटलमध्ये डॉक्टर रणवरे हा तिचा गर्भपात करणार असल्याची माहिती मिळाली होती.

 त्यानुसार डॉक्टर यम्पल्ले हे विधी सल्लागार एड. मेघा सतीश सोनतळे यांच्यासह श्रीराम हॉस्पिटल येथे आज रविवारी पोहोचले. या ठिकाणी डॉक्टर यम्पल्ले यांनी आपली ओळख सांगितली व त्यानंतर 14 मुद्द्यानुसार दवाखान्याची तपासणी केली.

 दवाखान्याच्या गर्भपात केंद्र व सोनोग्राफी केंद्राची तपासणी केली. त्यावेळी रजिस्टरमध्ये दिपाली थोपटे हे नाव नव्हते. मात्र महिलेच्या मोबाईल क्रमांकावर फोन केल्यानंतर त्यांच्याकडील नातेवाईकाने शनिवारी संध्याकाळीच गर्भपात केला असल्याची माहिती दिली. हा गर्भपात डॉ. सचिन रणवरे याने केला असून त्यासाठी बरकडे नावाच्या एजंटने गर्भलिंगनिदान केले असल्याची माहिती देखील मिळाली.

त्यानंतर डॉक्टर यम्पल्ले यांनी पुन्हा डॉक्टर सचिन रणवरे यांच्याकडे चौकशी केली, तेव्हा सचिन रणवरे यांनी दिपाली थोपटे यांचे अर्धवट भरलेले अर्ज व इतर माहिती डॉक्टर यांच्याकडे दिली. त्यातून या ठिकाणी बेकायदेशीर रित्या गर्भात झाल्याचे निष्पन्न झाले. त्यावरून डॉक्टर एंपले यांनी पोलिसांकडे दिली.